Celalî Çelîk
Warê nuştişê zazakî de xebatê edebî her ke şonê hîna xurt benê û averşîyayîşê xo domnenê. Nê warî de sahaya şiîrîye zî sewîyeyêka zaf başe vînena û hetê weşanxaneyanê cîyayan ra xeylêk eserê zazakî resenê wendoxan. Nê şaîranê ma yê qedirbilindan ra yew zî Wisiv Pîrbab o.
Wisiv Pîrbab serra 1970yî de qezaya Pulurî ya Dêrsimî, dewa Axdadî de ame dinya. Wendena xo ya verêne dewa Îksorî de temam kerde û badê cû zî di serrî Xarpêt de dest da mektebê mîyanênî. Pîrbab serra 2009î de seba xebat û faalîyetê xo yê sîyasîyan ame girewtene û hepsxaneyê Midyad, Çewlîg û Depe de hema hema hîrê serrî mend; serrê 2012yî de zî bî verdaye.
Wexto ke zereyê hepsxaneyî de bî, weşanîyayîşê rojnameyê Newepelî û kovara edebî û hunerî Şewçila rêça ey bedilnaye; Wisifî nê çaxî de dest bi nuştişê şiîranê zazakî kerd.
Zerrîya şîîranê ey de hîsê sey xerîbîye, bêrîya welatî, hesret, agêrayîşê wextanê verênan, xem û dej, eşq, teynatîye, embazîye û tabîetê xozaye cayêko bingeyîn gênê.
Eserê Ey:
Wisiv Pîrbab, Derdê Hîris û Heştî (şîîre), Weşanxaneyê Roşna, Dîyarbekir, 2013, 64 rîpelî.
Şîîranê Wisiv Pîrbabî ra çend nimûneyî:
BÊBEXT
Şima bi bêbextîye kewtê nê erdê ma
Rehet nêverdanê weş û merdeyê ma
Adir verdayo welat, veşeno birr û cedreyê ma
Salê qet çin bo mirdwerdişê şima
Her vîyar û tapik de virazenê yew qereqol
Harçîg û Mizurî ser o girê danê baraj û gol
Wina wazenê ke no welatê ma bibo çol
Ma qir kenê, gonîya ma rişnenê dere û dol
Welat bomba kenê zîyaran û dîyaran
Mendîme bê sitare bê dewe û bê waran
Genc û xortanê ma benê erzenê daran
Zindanan de ma kişenê bi ax û zaran
Teyna ê şima nîya er ona dîna
Bizanê ke peynîya bêbextîye çin a
Roje yena bîna xayînî kî rijîna
Ancî aştîye û birayîye virazîna
Heval Wisiv ho Çewlîg de hepis de
Welatê ma talan kenê têduşt de
Peynîya şima nêzdîya ewro meşte
Xortê ma yê koyan de, mawzer o dest de
DERDE HIRÎS Û HEŞTÎ
Axx! Tarîh tarîxê hîris û heştî
Dêrsim de Kirmancî pêro qir kerdî
Xortê cîwanî ağır makine wa terdî
Meyît û cendegê ma xo rê werdî
Nê ez se xo vîr ra bikerî nê derdî
Ey Hîris û Heşt, xo ra şerm bike
Azebê ma asêyan ra bîyê veyveke
Gonîya kirmancan şîye sey çirtike
Paga ma de westa ra leya sincike
Zaf jan dana dirbeta min a luke
Ax axx kergana Hîris û Heştî
Binê her kemere de mendî meyîtî
Vat ke biwerê, kirmancê, ehlê beytî
Sungî ya pîzê maye ra domanî vetî
Qet weş nêbenê xem ya nê dibetî
Axx dirbeta Hîris û Heştî
Kardî ya cira kerdî ling û destî
Cîgeran de qerşunê sîyayî veştî
Canikê nazlû jîndanan ro eştî
Derdan zerrîya ma de halîndî viraştî
Axx derba Hîris û Heştî
Tayê weşa-weş sungî kerdî
Tayê welatan ro surgun berdî
Memleketan de viran û vêşan merdî
Axx mi de yenê mezele nê derdî
Ax fermana Hîris û Heştî
Kokimî dar û kemeran a kiştî
Esîrê ma kila adirî ya pîştî
Sungî dirbetan ra ant, gonî lîştî
Mi vîr ra nêşonê derdê ordîyê Mistî
Axx tofana Hîris û Heştî har a
Goşê ma cira kerdî, kerdî la ra
Hewtay hezar tenî kiştî m ara
Duzê Xarpêtî de xeneqitî ebi a dar a
Na kergane aj û ajê mi rê bar
