Rojnameger Murat Agirelo ke seba xeberanê xo yê derheqê tehqîqatê fonî de hepsê keyeyî de bi, saetanê şewdirî de bi operasyono ke keyeyê ey rê ame kerdene, ame dest bendkerdene.
Murat Agirel, dima cigêrayîşê ke keyeyê ey de ame kerdene, sewqê Mudirîya Emnîyetî ya Îstanbulî bi.
Rojnameger Agirel, seba ke tehqîqatê fonî kerdbî xeber, hepsê keyeyî de mendêne.
Eşkerakerdişê Mustafa Sarigülî
Goreyê neqlkerdişê rojnameger Îsmaîl Saymazî, pîya bi rojnameger Murat Agirelî, sîyasetmedare Aylin Kotil û lajê aye Omer Sarigül zî ameyî dest bendkerdene. Îsmaîl Saymazî îfade kerd ke seba Emîr Sarigülî zî qerarê destbendkerdişî esto û neql kerd ke Mustafa Sarigül Partîya Newîye babeta tehqîqatî sey “yew meseleya tîcarîye ya ke Almanya dir girêdaye ya” xulasa kerda.
Mesajê rojnameger Îsmaîl Saymazî wina yo:
“Rojnameger Murat Agirel, sîyasetmedare Aylin Kotil û lajê aye Omer Sarigül, hetê ekîbanê Şubeyê Malîye ra ameyî destbendkerdene. Seba Emîr Sarigülî zî qerarê destbendkerdişî esto.
Mustafa Sarigül va ke lajê ey Emîr zî do teslîmê emnîyetî bibo.
Sarigül vano ke no tehqîqat yew meseleya tîcarî ya ke Almanya dir girêdaye ya û Agirel zî seba ke bikero xeber tewrê nê prosesî bîyo.”
