Hunermendê tîyatroyî û şaîro kurd Tekîn Agaciko ke 10 serran ra zêdêr o Estonya de cuyêne û waştişê ey yo îltîca ameybî redkerdene, şewa bîne teslîmê Tirkîya ame kerdene. Ame îdîakerdene ke sebebê şawitişê Tekîn Agacikî yo seba Tirkîya “endamîya rêxistine” ya.
Ame vatiş ke Agaciko ke verê cû zî waştişê îltîca kerdbi labelê waştişê ey ameybi redkerdene, ey reyadiyîne muracatkerd la bi îdîaya “endamîya rêxistine” qebûl nêbi.
Agaciko ke şewa bîne ame ardene Teyaragehê Îstanbulî, qereqolê teyaragehî de muameleyê îfadeyê ey dewam keno. Goreyê agahîya ke avûkatan daya, dima muameleyanê îfadeyî yê teyaragehî Agacik do sewqê Mudirîya Emnîyetî ya Îstanbulî bibo.
Agaciko ke 18 dosyayanê cîyayan ra do îfadeyê ey bêro girewtene, derheqê ey de bi îdîaya “endamîya rêxistine” dosyeyêke esta; 17 dosyeyê bînî zî pêro seba parekerdişanê medyaya dîjîtale, “heqaretkerdişê Serekkomarî” û “propagandaya rêxistine” ra yenê pê.
Tekîn Agacik kam o?
Tekîn Agacik, kaykero tîyatroyî û şaîr o. 2yê teşrîna verêna 1972yî de Erzîgan de ame dinya. Hema ke 8 serrî bi babîyê xo, 14 serrî de zî maya xo vîndî kerde. Seba feqîrîye, dima mektebê verênî nêeşka perwerdeyê xo bidomno û mecbur mend ke bixebityo.
Agaciko ke serranê ciwanîya xo de eleqe da şîîre, serra 1996î ra nata dest bi tîyatroyî zî kerd. Zaf grûbanê tîyatroyî de ca girewt û vejîya sehne. Ewro bi kirdkî (zazakî) nawnayîşanê stand-upî virazeno û kayanê tîyatroyî zî reyna bi Zazakî.
Kitabê ey yo verên yo şîîran “Tayê Bota Şo, Ez Ciwîyena” payîzê serra 2008î de weşanîya. Şîîr û nuşteyê ey zî kovara “İnsancıl”î de weşanîyayî.
