Nuştox: Wendox Ganî
Seba yew ziwanî qiseykerdiş tena bes nîyo. Nuştiş û wendiş nêbo, ey ziwan hêdî hêdî beno yew ziwano bindest û asîmîlasyonê ey dest pêkeno, çike yew ziwan tena bi qiseykerdişî aver nêşino, labelê însanî dinya de her dem bi teknolojî,bi felsefe, bi sosyalbîyayîşî ûsn aver şinê. No zî ciwîyayîşî de newe çekuyî vateyî û formê qiseykerdişî vejeno û bedilneno. Yanî ez vana ke seba ke dinya nika aver şîya û ha şina, ma zî ganî ziwanê xo zî dinya dir aver biberî. Nêke seba ke ziwanê ma tapa maneno, mecburê ziwanan bînan beno û êdî însanê ma zî qiseykerdişê ziwanê ma, sey yew sembola tapamendişî vînênê û hêdî hêdî ziwanê xo ra dur şinê. Ez tîya de qala heme nuştişê kurdkî ney tena ser dîjîtalbîyayîşî kena. Xora averşîyayîşê dinya êdî bi dîjîtalbîyayîşî dewam keno. Seba ey ez do ser dîjîtalbîyayîşî de fikrê xo vajî.
Dîjîtalbîyayîşê kurdkî averşîyayîşî de zaf muhîm o. Ewro şertê dinya bedilyayê. Însanî êdî sey verê seba yew Melumatî, kitaban, rojnameyan û kovaran nêwanênê, çike êdî înternet est o û zafê çîyî tîya de est ê û resnayîşê înan zî goreyê yew kitabî û rojnameyî ra helbet zaf asan o. No zî rewşê nuşteyê fîzîkî vera vera xirab keno. Helbet ez nêvana êdî kitabî bêtesîr ê. Kitabî çimê mi de her wext tewr çîyê muhîm ê. Labelê ma heme qebul kenê ke dîjîtalbîyayîş tesîrê kitaban kêmîneno.
Kurmancî û Soranî mîyanê ziwanê kurdkî de tewr aver şîyaye yê û dîjîtal de zî hîna zaf cayê înan est o. Labelê hema zî zaf kêmî yê. Seba aver şîyayîşê heme ziwanê kurdkî ganî sey tîyatro, sînema, TV,medyaya komelkî û sîteyê webî bikurdkî bêrî şuxulîyayîş. Mînak ez medyaya komelkî de vînena, ê rîpelê ke seba kurdî û Kurdan çîke kenê, zafê înan bi Erebkî, Fariskî, Tirkî , îngîlîzkî û Almankî kenê. Helbet ez nêvana xelet kenê, ez vana metodê înan xelet o.
Bêguman dîjîtalbîyayîş hende tena nîyo. Labelê goreyê mi ra tewr çîyo muhîm dîjîtalbîyayîşî de nê yê; sîstemê ziwanê cîhazan û jîro viraşta. Mi bi xo tecrûbe kerdo ke sîstemê ziwanê cîhazan seba banderbîyayîşî zaf muhîm o, hela jîro viraşta hema ey ra zî muhîm o. Cigêrayîşî ke ser jîro viraşta ameyê kerdene, mînak; OECD, GALLUP HEPI ûsn , nawenê ke hema hema hîrê însanî ra yew êdî aktîf yew jîro viraşta şuxulneno û do ameyox de no hîna zêde bibo. Çi heyf ke tewr kemasîya kurdkî zî tîya de est a, Kurmancî reyna hêdî hêdî cayê xo gêno de, seba zazakî zor o.Çike zazakî de gramer caverd ma nêeşkenê yew alfabe ser o zî kom bibê. Mi par yew merdimî nas kerd ,o xo sey yew ziwannas dîyêne û zazakî çend çî nuşt bî.Mi tay wend labelê alfabeyê ey ne kurdkî ne zî Tirkî bî, Dema ke ez ey ra persaya , vat: "xo ra zazakî de yew alfabe çin o, bê min û to , ma yew alfabe vejê" . Çi heyf ke rewşa ma wina ya. Seba mi alfabeyê ma bellî yo, labelê gramerê ma de nuştoxê ma pê nêkenê.Ez hêvî kena ke Nuştoxê kurdkî û sey mi wendoxê kurdkî zî ser yew gramerî de do pê bikerê.
