Sempozyûmê “Heqê Qiseykerdişî: Vîrê Komelî, Şahîdîye û Travma” ke bi hemkarîya Komeleya Xebatanê Travmayî do bêro organîzekerdiş, munaqeşeyanê Forumê Aştî û Azadîya Komelkîye dewam keno. Roja verêne de Salona Konferansî ya Ali Emirî ya Şaredarîya Şaristanê Girdî de çar panelî û Roniştişê Pêşnîyazanê Polîtîkayan, roja dîyine de zî Rayîrşîyayîşê Vîrî û Atolyeya “Çîyê ke Vîrê Ma de Mendî” do bêrê kerdiş.
Pêdîyayîşî de ke do di rojî dewam bikero, tesîrê şîdet, vindîbîyayîş û bêvengîyanê mecbûrîyan ê vîyarteyî yê serê ruhîyetê şexsî û komelkî do bêrê munaqeşakerdiş. Amanc o yo ke hîkaye û tecrubeyê ke nêameyî vatiş, bi têkilîya vîr, şahîdîye, şîne û edaletî pîya bêrê qiseykerdiş.
Qiseykerdişê akerdişî
Bername do 7ê teşrîna peyêne de saete 09.15 de bi qeydkerdişan dest pêbikero; saete 09.45–10.30 de Hemşaredara Şaredarîya Şaristanê Girdî Serra Bucak û Sereka Komeleya Xebatanê Travmayî Nergiz Ozdemîr Eke do qiseykerdişanê akerdişî bikerê.
Ziwan, nasname û travmaya mabênê neslan
Panelo verên ê bi sernameyê “Vengê Bêvengkerdeyî: Ziwan, Nasname û Travmaya Mabênê Neslan” saete 10.30–12.00 de bi moderatorîya sosyolog Dr. Ronayî Onen do bibo. Psîkîyatrîst û nuştox Azad Gunderci û psîkolog Sîyabend Aslan do pêşkêşîyanê xo bikerê; Dr. Jan Îlhan Kizilhan zî do onlîne beşdar bibo.
Vindîkerdişo bi zorî, bêcezayîye û şîn
Panelê “Vindîbîyayîş û Şahîdîye: Vindîkerdişo bi Zor, Bêcezayîye û Şîn” saete 12.15–13.45 de bi moderatorîya pisporê xizmetê komelkî Îrfan Ekîncîyî do bibo. Pawitoxa heqan Sebla Arcan, Sekretera Cinîyan a Komeleya Heqanê Merdiman (ÎHD) Handan Coşkun û noropsîkolog Masum Aydin do qisey bikerê.
Xoverdayîş û vîrê cinîyan
Panelê “Xoverdayîş û Vîrê Cinîyan” saete 14.45–15.45 de bi moderatorîya sosyologe Dîdem Aydemîre do bibo; aktîvîsta TJA Esra Kahraman û Rojda Bedîa Akkaya ya Tevgera Jinên Azad do qisey bikerê.
Binpaykerdişê heqan, vîrê bedenî û şertê başkerdişî
Panelo çarin ê bi sernameyê “Çîyo ke Beden de Mendo” saete 16.00–17.15 de bi moderatorîya pisporê xizmetê komelkî Nîhal Bozhan Ozbek do bibo. Dr. Burhanettîn Kaya, sosyolog û pisporê travmayî Dilşen Ozden û zanyara sîyasetî ya Unîversîteya Lundî Dr. Pinar Dinç do pêşkêşîyanê xo bidê.
Pêşnîyazê polîtîkayan seba bernameyanê piştîdayîşê herêmkî
Roniştişê Pêşnîyazanê Polîtîkayan saete 17.30–18.40 de bi pêşkêşîyêka kilme ya derheqê xebatanê vîrî û bernameyanê piştîyê herêmkî yê Şaredarîya Şaristanê Girdî de do dest pêbikero ke seba mexdûranê binpaykerdişê heqan û keyeyanê vindîbîyayeyan ê. Roniştiş do bi asankerdoxîya Dr. Yasîn Duman û psîkologe Zelal Kocakaya bêro ramitiş. Roja verêne do saete 18.45 de bi qiseykerdişanê Gîzem Uygur, Dr. Azad Dildar Gunderci û Hemşaredarê Şaredarîya Şaristanê Girdî Emîn Ayî biqedîyo.
8ê teşrîna peyêne de Rayîrşîyayîşê Vîrî
Rayîrşîyayîşê Vîrî: “Vîrardiş, Şahîdîyekerdiş, Nêdayîş Vîrrakerdiş” do 8ê teşrîna peyêne de saete 09.30–13.30 de bi rayberîya Derya Bozarslan a Merkezê Heqîqet, Edalet û Vîrî bibo. Rayîrşîyayîş do Meydanê Berê Koyî ra dest pêbikero û Berê Seray, Mînareya Çarlingine, Kilîseyê Surp Giragos ê Armenîyan, Kilîseyê Surp Sarkis, Abîdeyê Wijdanê Hemparî û Goristanê Armenîyan ra bivîro. Saete 14.30–16.00 de zî Atolyeya “Çîyê ke Vîrê Ma de Mendî” do bêra organîzekerdiş.
Beşdarî bêpere yo û seba herkesî akerde yo
Sempozyûm de ke tede panelê bi tirkî û kurdkî est ê, beşdarî bêpere û seba herkesî akerde yo. Kontenjanê Rayîrşîyayîşê Vîrî 20 kesî yo; qeydê rayîrşîyayîşî do 7ê teşrîna peyêne de warê sempozyûmî de bêrê girewtiş.
