Amedsporo ke Trendyol Super Lîg de têkoşînê xo yê seba lîderîye domneno, roja emşo beno meymanê Samsunsporî. Maço ke Stadyûmê 19ê Gulane yo Newe yê Samsunî de saete 19.00 de dest pêbikero, hekemê ci Kadîr Saglam o.
Taximo kesk û sûr, maçê xo yo peyên yê lîgî de Konyaspor 1-0 mexlûb kerdbi û puanê xo vetbi 17î.
Amedspor wazeno firsendê lîderîye bierjno
Amedsporo ke 8 hewteyanê vîyarteyan de 5 serkewtişî (galîbîyetî), 2 seypêmendişî û 1 binkewtiş (mexlûbîyet) girewtê, bi 17 puananê ke arê dayê rêza diyîne de ca gêno.
Temsîlkarê Amedî yo ke 2 puan peyê lîder Galatasarayî de yo, eke deplasmanê Samsunsporî ra bi serkewtiş agêro do puanê xo bivejo 20.
Samsunsporî 6 maçê xo yê peyênî vîndî kerdî
Reqîbê Amedsporî Samsunspor zî lîg de dewrêko zehmetin ra ravêreno.
Temsîlkarê Deryayê Sîyayî yo ke 6 maçanê xo yê peyênan ê lîgî ra bi mexlûbîyet vejîyayo, bi 4 puanan rêza 17. de yo.
Samsunsporo ke maçê xo yo peyên de deplasman de vera Kasimpaşayî 4-1 bin kewt, wazeno vera Amedsporî qezenc bikero û peynî bido şîyayîşê xo yo xirab.
11o muhtemel yê Amedsporî
Verê maçî yeno pawitene ke Amedspor bi 11ê verênî yê Lafont, Krasniqi, Mehmet Yeşîl, Bates, Umut, Furkan, Raveloson, Saba, Ballet, Lutin û Orbanî vejîyo seha.
Maço ke saete 19.00 de dest pêbikero, ekrananê beIN SPORTS 1î ra bi weşano ganî do bêro weşanayene.
