Partîya Demokrasî û Seypêyî ya Şaran (DEM Parti) Kongreya xo ya 5ine kom kerde. Hemserekê Pêroyî yê partî Tuncer Bakirhanî ke kongre de qisey kerd, vat Tirkîya hewcedara mutabakatêkê komelkî û ameyoxê demokratîk a.
Bakirhani vat, ''Hinî Tirkîyêke hewce kena ke ma pêro tede bêrê cakerdene, komarêke rê dekrosîyêk rê hewcedarî esta. Mutabakatêkê komelkî yê neweyî rê hewcedarî est a.''
Bakirhanî bale ante huqûq û demokrasî ser û wina vat,’’Na seserre do bibo seserra kurdan, elewîyan, bindestestan û kedkaran. Eke kurdî bibê aktorê ronayoxî Tirkîya xurtêr bena. Rojhelatê mîyanênî îstîkrar fînena dest. DEM Partî sîyasetê rayîrê hîrêyinî rayra bena. Ma seba demokrasî û huqûqî israr kenê. Rayîrê ma rayîro hîrêyin o, rayîrê ma rayîrê demokrasî û haştîye yo. Ma Tirkîya ya demokratîke wazenê, komelê haştîye û demokratîkî wazenê. Ma ewroyî ra tepîya Têgêrayîşê Komara Demokratîke danê destpêkerdene. Ma wazenê Tirkîya îdare bikerê.''
Vîjnayîşo ke bi lîsteyêkî ame kerdene de 600 delegeyan raye şuxulnaye. Tulahe Hatimogullari û Tuncer Bakirhan sey Hemserekanê Pêroyî yê DEM Partî ameyî vîjnayene.
27 nameyê neweyî
Kongre de endamê esîl û cagirî yê Meclîsê Partî, Heyetê Dîsîplînî û Heyetê Pêardişî yê Merkezî ameyî bewlîkerdene. Heyetan de 45 nameyî ameyî bedilnayene, Meclîsê Partî ke tede 80 kesî ca genê, 28 endamê esîlî yê neweyî ameyî vîjnayene.
Mîyanê endamanê neweyan de Asiye Kolçak, Ayfer Fatma Çelik, Aylin Hacaloglu, Berdan Gunduz, Berivane Elter, Berna Çelik, Besriye Tekgur, Çigdeme Kose, Dogan Erbaş, Ekaterini Nikalao, Ekrem Baran, Elif Çoban, Eylem Saruca, Fikret Melih Çolakogulları, Saruhan Oluç, İbrahim Ateş, Mehmet Resul Baykara, Metin Kılavuz, Muhsin Dalfidan, Nayif Bulga, Omer Kulpu, Sedat Şenoglu, Sevda Çelik Ozbingol, Seyfettin Aydemir, Sezgin Kartal, Turkut Çatar, Vaysi Unat û Zeyyat Ceylan ca genê.