Baroya Amedî, derheqê Hemserekê Pêroyî yo verên yê HDPyî Selahattîn Demîrtaşî de eşkerayîyêk da û veng da ke wa qerarê Mehkemeya Heqanê Merdiman a Ewropa (MHME) bêro caardiş û pa bi Demîrtaşî heme tepişteyê Dewaya Kobanê bêrê veradayîş.
Eşkerayîye de baro eleqe ant qerarê MHMEyî ya 8ê Temmuza 2025î û ard vîr ke goreyê qerarê neweyî tepişîyayîşê yew bingehê xo yê huqûqî derheqê Demîrtaşî de çin o.
Dewam de ame vatiş ke MHMEyî qerarê xo de nîşan kerdo ke heqê azadîye, asayîşî, wextê muhakemeyê maqûlî û kontrolê darazî yê ke rewşa tepişteyîye reyde eleqedar ê, ameyê binpaykerdiş.
Eşkerayîye de wina ame vatiş:
"MHMEyî Tirkîya ra waşto ke Demîrtaşî verado. MHMEyî qerarê xo de vato ke lazim o pa bi Demîrtaşî, heme tepişteyê sîyasî yê ke çarçeweya Dewaya Kobanê de ameyê tepiştiş zî bêrê veradayîş. Baro, nîşan kerd ke caardişê nê qerarî yew gameya mecbûrî ya."
Baroye, ard vîrî ke îtîrazê vera qerarê MHMEyî do 8ê Teşrîna Verêne 2025 de biqedîyo û eke îtîraz nêro kerdene, qerar do qetî bibo û lazim o ke qerar bêro caardiş. Baro, veng da ke Demîrtaş û heme tepişteyê sîyasî yê ke eynî çarçewe de ameyê tepiştiş, ca de bêrê veradayîş.