Enwer Yılmaz
Ewro 3ê Kanûne Roja Astengdaran a Dinya ya. No roje, roja şayîye û pîrozbahîye nîya; roja 'ferqkerdişî' û 'seba heqanê astengan' roja micadeleyî ya.
Neteweyê Yewbîyayeyî (NY) serra 1992 de, seba ke bala rayaumûmîye bianco serê problemanê astengdaran û seba heqanê înan hişyarîye virazo, 3ê Kanûne sey "Roja Astengdaran a Dinya" îlan kerde.
Goreyê raporanê Dinya, nêzdîyê 15%ê nifûsê dinya (dorê 1 mîlyar kesî) astengdar ê. Labelê astengdarî, tena meseleyêka weşîye nîya; meseleya heqanê merdiman a.
Dinya de û welatê ma de bi mîlyonan merdimî "astengdar" ê. Tayî zerrî (qelb), ra tayê lingan ra, tayê çiman ra, tayê zî mezgê xo ra... Labelê astengo en pîl organê merdiman de nîyo; astengo en pîl, zerrî û mezgê merdiman de yo.
Wa ma xo vîra nêker; cuye de ca girewtiş, perwerde dîyayîş, xebitîyayîş û geyrayîş seba astengdaran yew "lutf" yan zî "xêr" nîyo; yew heqê bingeyîn o. Eger şaristanê ma, rayîrê ma, mekteb û kargehê ma goreyê astengdaran nêvirazîyê, suc ê înan nîyo, ê sîstemî yo.
Eger yew merdimo ke lingê ci çin ê, nêeşkeno vejîyo kaldirim, o asteng lingan de nîyo, şaredarîye de yo.
Eger yew merdimo ke nêvîneno, nêşeno bi rehetî şêro kar, o asteng çiman de nîyo, komel de yo.
Eger yew tuto astengdar nêşeno şêro mekteb, o asteng nêweşî nîyo, bêwijdanî yo.
Bêrê ma astengan wedarê
Her merdim, namzetê astengdarîye yo. Ewro ma sexlem ê, la siba ma nêzanê do çi bêro ma ser. Coka ganî ma cuye goreyê "heme kesan" dizayn biker.
Bêrê ma ewro soz bidê xo; ma do ferq bikerê, ma do asteng nêbê, ma do paşt bidê. Çunke astengo en pîl bêheskerdişî ya.
Gelo astengî çita ya? Astengî tena o nîyo ke merdim nêeşko rayîr ra şêro, nêvîno ya zî nêeşko bieşnawo.
Wexto ke ma rayîran, bînayan, wesayîtanê komelkîyan û kargehan goreyê astengdaran nêvirazê, ma bi destê xo înan rê astengîye vejenê.
Bi hêvîya ke ma astenganê zerrî û mezgê xo wedarê û dinyayêka bêasteng awan bikerê.