Bahrî ÇABUK
Wexto ke Helepçe yena vatene… Qirika însanî de girê ke peyda beno… Cimleyî vindenê û însan wazeno ke cimleyanê xo bi hîre nuqtan û yew vengok biqedêno. Wexto ke Helepçe yena vatene… Mezgê însanî de fotografê ke peyda beno… Cimleyî vindenê û însan wazeno ke cimleyanê xo bi hîre nuqtan û yew vengok biqedêno. Wexto ke Helepçe yena vatene… Hişmendîya însanî de boya seyan ke peyda bena… Cimleyî vindenê û însan wazeno ke cimleyanê xo bi hîre nuqtan û yew vengok biqedêno. Wexto ke Helepçe yena vatene… Vîr û bîrî însanî de pêsîra dadîyan de cimê tutanê seyheskerdoxan peyda benê… Cimleyî vindenê û însan wazeno ke cimleyanê xo bi hîre nuqtan û yew vengok biqedêno.
Serre 1988…Aşma Edere yo… Helepçe de şodir o… Şodirê wesarî yo… Vayê honikî boya vilikan ardêne. Vore helîya ya… Serd kêmî biye yo… Panc rocî roşanê newrozî ra mendo… Tebîetî xo newe kerd o… Derûdor kesk o… Keskîyê weşî dêne zerrîya heme ganîyan… Her ca vildar biyo… Boya vilikan heme ganîyan rê şahîûweşî ard o… Hawirdor bi vengê ganîyan xemelya yo… Dûrî ra xim-xima vengê tebîetî yeno… Însan wazeno ke xim-xima vengê tebîetî goştarî bikero… Goştariya vengê gandarîya tebîetî însanî ra seka deyirê ke tilsmin ameyêne… Nê tilsimî zerrîya însanî de şahî zêdnêne… Însanî miraqê nê tilsimê zerrîye xo kerdêne… Wexto ke tilsimê zerrî de miraq virazyêne, însanî waştêne ke zêdeyîn vengê gandarîya tebîetî goştarî biker o… Wexto kê insan vengê tebîetê gandarî goştarî kerdêne, însan heyran û heşmetkar mendêne; no roco xemgîn de tebîetî hinde vengê ke sîstematîk û zerrîzîz vetêne… Boya vilikan meyxoşê bi û însan zerrîxoş kerdêne… Vilikî nîşaneya wesarî û zerrî çoşî bi… Wesar bi û boya vilikan heme gandarî zerrîzîzî kerdî bî…
Serre 1988… 16-17ê Edare… Wext windert bi… Fotografan qisêkerdêne. Destê Ramazan Öztürk î lerzêne… Helepçe de şodir o… Şodirê mergî yo… Vayê germînî boya seyan vila kerdo. Ganîyî helîya ya… Sereyî erda ra war biye… Panc hezarî… Şeş hezarî… Hewt hezarî.. Heşt hezarî… Ganî wara derg mendê… Bajar xo bi merg newe kerd o… Derûdor pirê cendekan o… Sikakî boye mergî rişnenê zerrîya heme ganîyan… Her ca de merg vildar biyo… Boya vilikan heme ganîyan rê merg ard o… Hawirdor bêvengîya ganîyan ra retemya yo… Dûrî ra vengê mergî yeno… Însanî nêwaştêne ke vengê mergî goştarî bikero… Goştariya vengê mergî însanî ra seke xemgînîyê ke bêwayirî ameyêne… Na bêwayirî zerrîya însanî de bismar zixtkerdêne… Însanî bêwayirî ra xemgînîya zerrîye xo kerdêne… Wexto ke xemgînîya zerrî de dej virazyêne, merdîm xo ra şermayêne, însanî waştêne ke mergê xo dima şiye ro…
Serre 2026… 16ê Edare yo… Dinya de reyna şer o… Rochelato miyanîn de reyna merg o. Helepçe cayê xo daya. Helepçe reyna Helepçe ya. Reyna Helepçe de şodir o… Şodirê wesarî yo… Vayo honîk boya vilikan ano. Vore helîya ya… Serd kêmî biye yo… Panc rocî newrozî ra mendo… Tebîetî xo newe kerd o… Derûdor kesk o… Keskîyê weşî dêne zerrîya heme ganîyan… Her ca vildar biyo… Boya vilikan heme ganîyan rê şahîûweşî ard o… Hawirdor bi vengê ganîyan xemelya yo… Dûrî ra xim-xima vengê tebîetî yeno… Însan wazeno ke xim-xima vengê tebîetî goştarî bikero… Goştariya vengê gandarîya tebîetî însanî ra seka deyirê ke tilsmin yeno… Nê tilsimî zerrîya însanî de şahî zêdnêno… Însan miraqê nê tilsimê zerrîye xo keno… Wexto ke tilsimê zerrî de miraq virazyêno, însanî wazeno ke zêdeyîn vengê gandarîya tebîetî goştarî biker o… Wexto kê insan vengê tebîetê gandarî goştarî keno, însan heyran û heşmetkar maneno; no roco xemgîn de tebîetî hinde vengê ke sîstematîk û zerrîzîz vejeno… Boya vilikan meyxoşa û însan zerrîxoş keno… Vilikî nîşaneya wesarî û zerrî çoş ardo… Wesar bi û boya vilikan heme gandarî zerrîzîzî kerd o… Helepçe pawiteya Guernika ya xo ya… Helepçe vana ke, bêrê mi bivînayêne û mi qet xo vîrî nêkerêne!!!
