Şahîya Kulturê Kirmancan (Zazayan) a desîne bi coş, bi serkewte û bi royê Kirmanckî û Kirmancîye roja 28.11.2025 de edi Cemxaneyê Berlin de virazîye. Şahîya Kulturê Kirmancan a ke her serre hetê Înstîtutê Ziwan û Kulturê Kirmancî (Zaza) –IKK- e. V. yî ra organîze bena, emserr bi moderatorîya hunermendo hêca Soner Soyerî programê şahîye saete 19:30 de dest pêkerd.
Dest pêkerdena programê şahîye de serekê Înstîtutê Ziwan û Kulturê Kirmancî Seyîtalî Dîkmenî kilmek derheqê Şahîya Kulturê Kirmancan de û derheqê kar û xizmeta Înstîtutî de qese kerd û xêr amayene dê meymanan. Birêz Dîkmenî qese kerdena xo ya kilme ra dime bi sloganê Înstîtutî: “Xo bêziwan, ziwanê xo kî bêwayîr mewerde!“ xelesnê.
Birêze programê şahîye berdewam kerd û şaîro hêca Îbrahîmê Xaşxaşe vejîya sahne û bi can û bi royê kirmancîye çend şîîrê xo wendî. Dima bi veng û rengê dengbêjîya xo Weysel Baran vejîya û lawukê xo yê kirmanckî û kurmancî bi rêze vatî.
Emserr rêya virena ke hardo dewrêş, hardo bimbarek Dêrsim ra hunermendo qedirgiran û mutevazî, hunermendo hêca Taylan Yildiz bi coş û bi çepikan vejîya sahne û hardê dewrêş ra, hardê zîyar û dîyaran ra, hardo bimbarek Kirmancîya Belekine ra bi performansêde rind lawukê xo yê weş û hîsdarî vatî. Nê hîsan û lawukanê Taylan Yildizi ra dima qase desûponc deqeyî bîne amê dayene.
Bîne ra dima, programê Şahîya Kulturê Kirmancan bi coş, bi serkewte û bi royê Kirmanckî û Kirmancîye berdewam kerd û Koroyê Vengê Ma yane koroyê cênîyan o ke îta Berlin de xêyle waxto warê ziwan û edebîyatê kirmanckî de xizmetê kenê û bi sewda, bi veng û rengê xo, can û ro danê lawukanê şarê ma û vanê, vejîyayî sahne. Koroyê Vengê Ma bi lawukanê xo bi kincanê xo yê renginan veng û reng da Şahîya Kulturê Kirmancan.
Îdarekerdoxanê Înstîtutê Ziwan û Kulturê Kirmancî, hunermanda hêca wa ke nayê ra des serrî ver ardî bî (serra 2015 de) Şahîya Kulturê Kirmancan a 1îne, serran ra têpîya emserr rêyna Şahîya Kulturê Kirmancan a 10. De ca da hunermenda hêcayê Xezale. Hunermenda delale bi zerya xo, bi performansêde hewl, bi vengê xo yê zelal û narînî lawukê xo yê weş û hîsdarî vatî û bi coş, bi serkewte û bi hunermendo hêca Taylan Yildizî programê xo xelesna.
Şahîya Kulturê Kirmancan a 10. emserr raşta kî zaf rind derbaz bîye. Cemxaneyê Berlin de ronîştene re ca nêmend ke milet ronîşo. Rind êno zanitene ke na xizmeta ziwan û kultirê ma kî hênî rehet rehet nêna werte. Na xizmeta ziwan û kultirî yane Şahîya Kulturê Kirmancan bi ked û emeg û bi fedekarîya Îdarekerdoxan û endamanê Înstîtutî ama werte. Coka, na şahîye de şarê ma kî ziwanê xo re, kulturê xo re, ra û rêça xo re wayîr vejîya û ma teyna nêwirdayme.
Şahîya ma bi serkewtiş, bi coş, bi royê Kirmanckî û Kirmancîye vêrde ra.
Bi nê hîsan, na Şahîya Kulturê Kirmancan a 10. de ked û emegê kam ke vêrdo ra, ma serê de; şarê man o hêca wo ke ma têyna nêvirday me; endamanê Înstîtutî re; moderatorê ma Soner Soyer re, şaîro hêca Îbrahîmê Xaşxaşe re, dengbêjo hêca Weysel Baran re, Koroyê Vengê Ma re, hunermendo hêca Taylan Yildiz re, hunermenda hêcayê Xezale re zere û can ra spas kenîme.
Oncîya dezgeh û komelanê ma re; serê de serêkê Cemxaneyî Dr. Yuksel Ozdemîr û îdarekerdoxanê Cemxaneyî re, Îdarekerdoxanê Cematê Dêrsim re, Îdarekerdoxanê Erzincan Küçük Otlukbeli Derneği Berlin e.V., Berlin re, Îdarekerdoxanê Omcali Kultur ve Dayanişma Derneği Berlin re û sponsoranê xo pêroyîne re zere û ca ra spas kenîme wa pêro pîya weş û war bê.
Îdarekerdoxê Înstîtutê Ziwan û Kulturê Kirmancî (Zaza) –IKK- e. V., Berlin
Seyîtalî Dîkmen, Gulten Narîn, Savaş Akay, Qemer Sarigol, Wusênê Gestemerde