ZAZAKÎ NEWS - Weşanxaneya Na bi yew mijdanîya pîle ya serê serre berê xwu yew cîhano newe yê tutanê kurdan rê akerd. Setê kitaban o bi nameyê “Doktor Jîjo” ke hîrê serrî verê cû hetê wendoxanê Kurmancî ra raştê yew eleqeyê pîlî amebi, êdî bi nameyê “Doktor Dije” bi Zazakîya ma ya weşike verê destê tutan de yo.
Enê her hîrê eserê ercayeyî hetê nuştoxê kedkarî Roşan Lezgînî ra bi yew ziwano serîh û zelal Kurdîya Kurmancî ra açarnîyayê Kurdîya Zazakî ser. Eserê ke qelema nuştoxa ercaya Sîya Sîtav ra ameyê meydan, bi xeyalanê dewlemendan û hîkayeyanê weşan bale ancenê xwu ser. Warê hunerî û dîtbarî ra zî kitabo yewin bi xêz û resimanê Merve Tunç, her di kitabê bînî zî bi hunerî resimî yê Esma Ak ameyê xemelnayiş.
Çapê Zazakî yê enê her hîrê kitaban bi sponsorîya Komeleya Ziwan-Komî ke eno serê 16 serran o ke Diyarbekir de fealîyetanê xwu dewam kena, bitaybetî zî bi ked û cehdê Av. Sidqî Zîlanî ameya kerdiş. Ena xebate semedê pawitiş û averberdişê Zazakîya ma yew gama zaf muhîm a. Setê Doktor Jîjo & Doktor Dijeyî bi kalîteyê teknîkê xwu yo baş, bi muhtewaya xwu ya perwerdekare û bi xêzanê rengînan êdî kitabxaneyê Kurdî de cayê xwu girewt.
Sey Weşanxaneyê Na, ma sipasîya xwu pêşkêşê nuştoxe, açarnayoxî, her di resaman û sponsorê projeyî kenê ke înan bi keda xwu xeyalê tutanê ma dewlemendtir kerd.
Weşanxaneya Na
Keyepel: www.nayayinlari.com
Medya Sosyale: na@kitap Mail:nayayinlari@gmail.com