ZAZAKÎ NEWS - Ame zanayîş ke Grûba Xebate ya Vateyî ke seba standardîzekerdişê kırmanckî (zazakî) xebatan keno, kombîyayîşê xo yo 41. Amed de viraşt. Kombîyayîşo ke Şaredarîya Pîlî ya Amedî meymandarîya ci kerd, akademîsyen, nuştox û mamostayî ardî têhet û seba 4 rojan programêk amade kerd.
Grûba Xebate ya Vateyî serra 1996î ra nat seba ke zaakî biba ziwanê nuştişî û standard, Ewropa û Tirkîya de xebatan kena. Grûbe hetanî nika nê kombîyayîşan de qaydeyê rastnuştişî tesbit kerdî, 10 hazar çekuyanê binyatan û 60 hazar varyantanê înan ser o xebitîya û înan de muqayese viraşt.
Grûbe bi taybetî waranê anatomî, huqûq, şaredarîye, cografya, edebîyat û perwerde de serê termanê teknîkan de xebitîyena.
Kombîyayîşan de babetanê sey alfabe, name, sifet, zemîr, edat, kar (fîîl) û bestoxan ser o ame vindertiş. Raporê ke yenê amadekerdiş munaqeşeyê beşdaran ra dima yenê qebulkerdiş û weşanîyenê. Qerarê ke nê kombîyayîşan de yenê girewtiş, Kovara Vateyî de yenê weşanayîş û şarî rê yenê aşkerekerdiş.
Kovara Vateyî ke serra 1997î ra nat yena weşanayîş, heta nika resaya 82 hûmaran. Grûbe hetê bînî ra xebatê sey “Ferhengê Kırmanckî (Zazakî)-Tirkî”, “Türkçe-Kırmancca (Zazaca) Sözlük” û “Rastnuştişê Kırmanckî” zî sey kitaban neşr kerdî.
‘Zazakî waşitşêka muhîm a’
Sernuştoxê Weşanxaneyê Vateyî Mehmet Uzunî aşkere kerd ke grûbe serra 1996î ra nat seba standardîzekerdişê zazakî bêvindertiş xebaanî kena û xebatanê xo Kovara Vateyî ser o neşr keno. Mehmet Uzunî beyanatê xo de va ke Weşanxaneyê Vateyî heta nika 150 kitabê zazakî çap kerdî.
Uzunî va: “Şaredarîya Pîlî ya Amedî derheqê termanê şaredarîye de ma ra waştişêk viraşt. Ma bi keyfweşî şaredarîye dir pîya xebatêka muştereke amade kerde. 6 kombîyayîşê ma serê termanê şaredarîye bîy. Bi pêroyî ma 40 kombîyayîşî kerdîbî, no zî bîyo kombîyayîşê ma yo 41..”
Mehmet Uzunî beyanatê xo de va ke mîyanê Grûba Xebate ya Vateyî de mînatiqanê cîya-cîyayan ra, Ewropa ra û akademî ra endamî estê. Ey va rolê cinîyan seba daxilkerdişê ziwanî zaf pîl o.
Uzunî aşkere kerd: “Sey Grûba Vateyî ma seba xebata muştereke bi saziyanê sivîlan (STK) re pîya her tim amade yê. Amancê ma no yo ke zazakî biba standard û hîna aktîf bêro şuxulnayîş..”
