Verê bînaya Mudirîya Perwerdeyî ya Bajarê Stenbolî de bi sloganê “perwerdeya bi ziwanê dadîye gamêk seba aştîya mayinde ya” eşkerayîya çapemenîye ameye dayene. Endam û îdarekarê dezgehanê ziwanê kurdkî û xeylêk hemwelatîyî tewrê çalekîye bîy. Çalekîye de pankartê bi nuşteyê “Statuyê Kurdkî, perwerdeyê bi Kurdkî” ameye akerdene û sloganê “Bê ziwan cuye nêbena” ameye berzkerdene. Metnê eşkerayîye bi kirdkî (Zazakî) hetê Hemsereka Komeleya Cigêrayîşanê Kurdkî Remziye Alparslane ra, bi kurmancî zî hetê Îdarekarê Zimanxaneyî Haci Erbekî ra ame wendene.
‘Seba aştîye ganî kurdkî bibo fermî’
Haci Erbekî da zanayene ke emser zî bi şertanê nêseypeyan û bêedaletîye serdema newîye ya perwerdeyî dest pêkerda û va: “Domanê kurdan emser zî bê heqê perwerdeyê bi ziwanê dadîye dest bi mektebî kenê. Tirkîya 100 serro ke polîtîkaya înkar û asîmîlasyonî kena. Meseleya kurdan meseleyêka sîyasî ya û parçeyê aye yo tewr muhîm zî ziwan û nasname yo. Waştişê ma seypeyîya heqîqîye, perwerdeyê bi ziwanê dadîye û fermîbîyayîşê ziwanê kurdkî yo.”
‘Wa zextê serê kurdkî bêrê wedaritene’
Erbekî dîyar kerd ke seba qedênayîşê cîyakerdîye ganî perwerdeyê bi ziwanê dadîye sere ra heta unîversîte bêro naskerdene û wina dewam kerd: “Zextê serê kurdkî ganî bêrê wedaritene; ganî kurdkî seba estbîyayîş û nasnameyê xo mehkemeyan de nêrê hedefgirewtene û cezakerdene. Çunke çew nêşêno estbîyayîşê yew miletî ceza biko.”
‘Astengê verê ziwanê dadîye ganî bêrê werzanayene’
Erbekî da zanayene ke tersê perwerdeyê bi kurdkî, tersê nasnameyê kurdan o û vat: “Ziwan stûnê kultur, tarîx û estbîyayîşî yo. Heqê perwerdeyê bi ziwanê dadîye heqo bingehîn yê merdiman o û heme peymanê mîyanneteweyîyan de ca gêno. Sey Swîsre, Kanada, Belçîka û Îspanya zaf cayan de heqê ziwanî ameyê qebûlkerdene. Ma dey Komeleya Cigêrayîşanê Kurdkî û Zimanxaneyî ma vanê; ganî heme astengê qanûnî û pratîkî yê verê perwerdeyê bi ziwanê dadîye bêrê wedaritene û no heq bêro garantîkerdene.”
Çalekî dima wendena beyanatî qedîyaye.
