Destpêkerdişê serra newîye ya perwerdeyî reyde waştişê perwerdeyê bi ziwanê dadîye reyna ame rojeve. Dîyarbekir de Platformê Sazgehanê Demokratîkan ke tede partîyê sîyasî, rêxistinê meslegî û dezgehê cematê sivîlî estbi, bi waştişê “Perwerdeyê bi ziwanê dadîye û kurdkî rê statu” rayîrşîyayîşêko qelebalix organîze kerd.
Koma ke Bayramoğlu de ameye têhet, bi pankartan heta Parka Koşuyoluyî şîye. Rayîrşîyayîşî ra pey verê Abîdeya Heqanê Merdiman de eşkerayîya çapemenîye ameye dayene.
“Kurdî hafizaya ma ya pîle ya”
Nameyê platformî ser ra Hemsereka Komeleya Cigêrayîşanê Ziwan û Kulturê Mezopotamya (MED-DER) Şükran Yakut qisey kerd. Yakute qiseykerdişê xo bi zaravayê kirdkî (zazakî) kerd û vat ke wendekarê kurdî sey serranê verênan emser zî heqê perwerdeyê bi kurdkî ra mehrûm mendê. Yakute da zanayene ke waştişê înan o bingehîn statûdayîşê ziwanî yo û îfade kerd ke ziwan nasname û kulturê miletêk o.
“Bê perwerdeyê bi ziwanê dadîye aştîyêka birûmet nêbena”
Mebûsê DEM Partî yê Dîyarbekirî Serhat Eren zî tewrê çalakîye bi û serê meseleya prosesê aştîye vinet. Erenî ard ziwan ke perwerdeyê bi ziwanê dadîye şertêko bingehîn o seba aştîyêka biqedr û wina va:
“Bê perwerdeyê bi ziwanê dadîye aştîyêka birûmet nêbena. Seba naye zî ganî ziwanê kurdkî sey ziwanê fermî bêro qebûlkerdene. Şarê ke ziwanê ci nêro naskerdene nasname û kulturê ci zî nêno qebûlkerdene. Statûdayîşê kurdkî yeno manaya qebûlkerdişê estbîyayîşê kurdan. Ganî bi vurîyayîşêko qanûnî kurdkî bêro garantîkerdene.”
