Kitabê cigêrayîşî yê Doç. Dr. Ercan Çağlayanî yo derheqê Zazayan de bi nameyê ZAZALAR serra 2016î de amebi çapkerdiş.
Çapê çarinî yê kitabê ZAZALARî nê rojan de ameyo vilakerdiş û çapo peyîn goreyê ê çapanê bînan ra hîna hîra yo.
Çapo peyîn zî hetê Weşananê Unîversîteya Bîlgî ra ame neşirkerdiş. Çapêkitabî yê verînî 240 rîpelî bî, çapê çarinî rê 150 rîpelî ameyî îlawekerdiş û kitab bi 390 rîpel vejîyayo. Ercan Çağlayanî her çapê newî de xebata xo hîna kerda hîra, zanayîşê neweyî îlawe kerdî û kitabê xo de zanayîşanê hîrayan dano.
Doç. Dr. Ercan Çağlayanî ronîyayîşê Komara Tirkîya ra û hetanî nika nuşteyê ke derheqê Zazayan de çapemenîya kemalîstan de vejîyayê, kitabê xo de zafêr ca dayo înan.
Çağlayanî yew qiseykerdişê xo de derheqê na babete de vatbi ke "Ronîyayîşê Komara Tirkîya ra tepîya îdeolog û medyaya Kemalîzmî Zazayan çîne hesibnayê, înan bi nameyê xirabinan name kerdê û bi no qayde kerdê ke nasnameyê înan bikê tirk û bi serran înan ser o polîtîkayê surgunkerdişî, qirkerdişî û asîmîlasyonî ramitê. "
Doç. Ercan Çağlayan Kam o?
Ercan Çağlayan serra 1980î de şaristanê Çolîgî, qezaya Bongilanî de ameyo dinya. Mehtebê Seretayî û Mîyanênî Bongilan de wend. Unîversîteya Atatürkî ya Erzurumî de beşê tarîxî de lisans, lîsanso berz û doktora kerd. Babetanê tarîx, nijadperestî , netewe-dewlet, kêmnetewî , modernîteya Kemalist û maduniyet ser o nuşteyê ey çap bîyê.
Kitabê ey: Cumhuriyet’in Diyarbakır’da Kimlik İnşası (1923-1950) (İletişim Yayınları, 2014), Zazalar: Tarih, Kültür ve Kimlik (İstanbul Bilgi Üniversitesi Yayınları, 2016) ve Kemalist Ulus-Devletin İnşası: Eğitim, Kültür, Mekân ve İskân Politikaları (Açılım Kitap, 2018).
Xusuî kîtabê ey ko ke Zazayan ser o nuşto, derheqê tarîx û kulturê Zazatan de sey kitabêko muhîm yeno vînayîş.
Çağlayan derheqê Zazayan, xususî zî demê ronîyayîşê Komara Tirkîya ra nata polîtîkayê Kemalîzmîê ser Zazayan ser o panel û semîneran dano û ê derheqî de zanayîşan dano.
Enwer Yılmaz / Zazakî News
