ZAZAKÎ NEWS - Merkezê Pêroyî yê Komeleyanê Elewîyan ê Demokratîkan (DAD), bi munasebetê serrgêra 89. ya Terteleyê Dersimî de beyanatêk da. Beyanat de ame vatiş ke Terteleyê Dersimî demê modernî de qirkerdişanê tewr pîlan ra yew o. Ame vatiş ke uca de bi hezaran kirmancî, doman ra heta koximê ke nêşayêne rayra şêrê, bi gazê jehrinî û guleyan ameyî kiştene; daristan û banê ke şar tede bi ameyî veşnayene.
DADî va ke, dorpêşkerdişê Dersimî ser o bi hawayêko bêmabên dewam keno. Sazîye beyanatê xo de aşkere kerd ke polîtîkayê qeyûman, kişyayîşê Gülistan Doku û talankerdişê xozaya Dersimî na rastîye mojnena. Seba 4ê Gulane "Roza Şîyaye" DADî veng da miletî û va: “Ma nêşênê nê çîyan ver tena tazîye bigîrê. Ganî ma na roje bikerê wesîlaya mucadeleyê demokrasîyî.”
DADî seba "Roza Şîyaye" Seyid Rıza, Alişer û Ana Zarife û heme mazluman vîr ardî û waştişê wîna rêz kerd:
1. Cayê mezalanê Seyid Rıza û rayberanê Dersimî yê ke ameyî îdamkerdene bêrê aşkerekerdene; cenazeyê înan teslîmê keyeyan bêrê kerdene.
2. Arşîvî bêrê akerdene û nameyê "Dersim"î bêro îadekerdene.
3. Lîsteya surgunbîyayan, vîndîbîyayan û domananê ma yê ke hetê dewlete ra ameyî girewtene, bêrê aşkerekerdene.
4. Heqê ma yê komelkî bêrê naskerdene û bikewê binê garantîya qanûnî.
5. Polîtîkayê asîmîlasyon û surgunî yê ke nika dewam kenê, ganî bêrê vindarnayış.