Çarçewaya projeyî de ke hetê IGNIS H2yî ra plan beno ke bêro caardene, selahîyetdarê şîrkete bi xeylê cendirmeyan reyde ameyî dewa Licikî ya Kanîreşî ke xebata warî bikerê. La dewijan vernîya makîneyanê karî de barîkat viraşt û destûr nêda xebatan.
Dewijan reaksîyon da û vat JES do zerar bido awa binê erdî, do mergeyan bihermno, do zerar bido heywandarî û do hemsengîya ekolojîke ya herême bihermno.
Dewijê Licikî ke bi citekarî û heywandarî cuya xo ramenê, waşt ke xebatê ke bê rizaya înan waranê şuxulnayîşê hemparî de yenê rayraberdene, bêrê vindarnayene.
Cendirme herême de tedbîran gênê û pawitişê dewijan ê seba astengkerdişê makîneyanê karî dewam keno. Sewbîna ame dîyarkerdene ke dezgehê komelê sîvîlî û rêxistinê ekolojî zî xo hazir kenê ke şêrê herême û piştî bidê dewijan.
