Mistefa GOMAYIJ
Pîlonî ma vatîn, qirdik mûndî ra coreseyê însonî, mûndî ra cêr sey heywano aseno. Leşa ey zaf zî pirçikina. Lingî ey zîpeyserkî yê. Zaf fêlbaz yew mexlûq o. Tersî ey adir û roşnayê a! Keye û keyberî ey ya dariston ya zî cawko awî ya.
Roj û roşnayê de orte de nêasen. La eki bi tarî se seyê Ehrîmane beno xirab!! Cinî, comerd û gedo ra ayêk zaf weswesey, kokimî ,tena cuwîn û vîyayêxapeynen xo fînen dexîl dî yew şinasî de yêne û vengî xo zî texlîte keno! Kurbanî xo ya yewzixir ra ya zî ko ra beno yew çirra vir kenowar! Corde bi temaşeya ewnêno leşra ;eke bêgana se nekonî xo çêqî keno şino mezgî ey/aye vejeno û uca wen!!
Dapîra mi vatîn, qirdik zaf muselatî merdimî weswesî û cinîya vîyay beno.Vatîn ez yewzemo vîyay ba. Rinde mi vîra yeno aya şewa ke qirdîk ez xapeynawo yew şewa payîz da peyenbi. Ma cinîyonî dewe ayo yere pawitîn gawonî û şonî. Cinîyo ra yewî va, bêrî ma mişore bikerî şefeq dî sibay ra şorî no qot ra xorî çarro bîyarî. Pêrin têfek ra va, wa bo. Axir deware ume, ma grewt zere, alefna û hergo yew vilay bîy şî. Mi zî axur ra resney derzî grewt şîya cor. Şomewerde û rakewta.
Çend zemon vîyarte ez nêzona la mi dîlojin ra yew vengo şinasî ume mi va:-Beye beye!! Beyee warze ma erey kewtî! Embazî ma şî! Mi lezabez kincî xo piraye grewtî û resne eşte xo pol bere akerde û vejîyaya teber raştî be vengî şîyo! Yew mi ra yew vengî ra, yew mi ra yew veng ra!! Ez xelmaşî hewnî yo. Yew muja va’yî kewte mina eze sewse bîya û mi xofe kerd!! Seke yew mi ra vajo na şewa tarî û zulomat de ti şona ça? Ez ewnêyaw asmîn ra eke estarey sey çilay beriqênî. Hêşî me umeca; eke şewa ,tarî ya, zilomato û yaz yabono! Ne embazî ney zî yew qerat aseno!Mi uca şike kerde ke o venge vengî qirdîk yo!
Ne yew ne di çıqas ke hemtî mi be ez peyser vazdaya dewe! Şîya keye mi ber pey ra surutme kerd! La vengî qirdikî mi dimaz imaynî!
Axir ez aya şewe qirdîk destra filitîyaya!
Vatox: Dabey “Keynay Elî Gawono”
