Fabrîqaya tekstîlî ya ke Dêrsim de tekane bî, hewteyêk o ke girewte ya. Seba grevê 17 karkeran, nêzdîyê 120 karkerî bêkar mendî.
Fabrîqaya ke seba nêzdîyê 120 kesan çimeyê debarî bî û 8 welatan rê mal erşawitêne, seba grevê 17 karkeran kar vindarna.
Îdareyê fabrîqa seba na rewşe hewteyêk o ke berê xo girewto û falîyetê xo vindarnayo.
"Ma karê xo wazenê"
Yew karkerê fabrîqa Bariş Ozdenî vat ke ê seba grevî mexdûr bîyê û karê xo wazenê û wina dewam kerd:
“17 embazanê ma fek kar ra verada, çalakîyanê sendika de ca girewtî û seba çalakîyanê înan, xebatê ma ameyî vindarnayene. Ma tîya de seba markaya dinya Zara berheman viraştêne û nê berhemî bi no hawa welatan rê vila bîyêne. Nika 85-90 embazê ma mexdûr ê, ma karê xo wazenê."
Goreyê agahîyan, çend aşmî verî, servîsê fabrîqa de mabênê yew qismê karkeran de problem vejîyayo. Badê ke problem bi dîyalogî nêame çareserkerdene, 17 karkeran karî ra fek verada û bi paştîdayîşê sendîka û hetanê sîyasîyan dest bi grevî kerd. Labelê seba grevê înan, nika heme karkerê bînî bêkar mendê û paweyê çareserîye yê.
