Hewteyê 20. yê Lîga 1. ya TFFyî de Amedspor, Stadyumê Amedî de Çorum FK kerd mêman. Hewa serd bi la hezaran terefdarî trîbunî kerdî pirr û paştî day taximê xo. Amedspor bi serkewtişê 1-0 maç qedîna.
Golo ke Amedsporî rê serkewtiş ard, deqîqeya 45+1. de hetê Mbaye Diagneyî ame. Golkerê Senegallijî bi nê golî hûmara golanê xo yê lîgî vet 17.
Transferê neweyî seha de bîy
Transferanê neweyan ra stoper Tarkan Serbest 11ê verênî de dest pêkerd, la destpêkê nêmeyê diyinî de cayê xo verada Adama Traorêyî. Transfero bîn o newe Florent Hasani zî deqîqeya 67. de herinda Afena Gyanî de kewt kay û bi formaya Amedsporî vejîya maçê xo yo verên.
Amedspor o ke bi nê serkewtişî puanê xo vet 42, hefte sey lîder qedîna û rayîrê şampîyonîye de gamêka muhîme eşte.
Enwer Yılmaz