ZAZAKÎ NEWS - Qezaya Amedî Erxenî de seba pawitiş û averberdişê Zazakî-Kirdkî gamêka weşe amey eştiş. Qeza de kursê musnayîşê Zazakî ame akerdiş.
Kurs o ke hetê Şubeya Egîtîm Senî ya Erxenî ra yeno organîzekerdiş, tede dersî bînaya sendîkaya (Egîtîm Sen) ke Erxenî de ya, uca yenê dayîş. Mamostayê ziwanî Mehmet Şah Aslan o ke perwerdeyê kursî dano, derheqê xebata newîye de malumatî pare kerdî û da zanayîş ke eleqeyêko zaf baş ê şarî esto.
"Seba 5-6 hefteyan yeno plankerdiş"
Mamosta Mehmet Şah Aslanî îfade kerd ke înan Erxenî de xebatêk semedê Zazakî daya dest pêkerdiş wina va: "Emser ma Erxenî de kursê Zazakî akerd. Bi raştî zî şarê ma eleqeyêko zaf baş mojna ci. Heta nika nezdîya 30 kesan muracatê kursê ma kerdo. Ma kursê xo bi sewîyeya destpêkî da destpêkerdiş. Ma plan kenê ke panc-şeş hewte perwerdeyê sewîyeya destpêkî bidê. Eke îhtîyac û waştiş bibo, ma do badê cû zî perwerdeyanê xo rê dewam bikerê."