Forum mabênê 12-16ê gulane de Amed de do bêro viraştene û 5 rojî dewam keno. Çarçewaya forûmî de awankerdişê aştîya komelkî, xurtkerdişê komela demokratîke, azadîya cinî, kultur-huner, ekolojî, koç, vîr, huqûq û pîyaciwîyayîş do bêrê erjnayene.
Çarçewaya forumî de panelî, qiseykerdişî, atolyeyî, nîşandayîşê fîlman û çalakîyê kulturî do bêrê viraştene. Akademîsyenî, sîyasetmedarî, hunermendî, huqûqnasî, rojnamegerî û temsîlkarê rêxistinanê komelê sîvîlî roniştişanê cîya-cîyayan de do bêrê têhet.
Akerdiş saete 17:30 de
Qiseykerdişê akerdişî yê Forumî meşte saete 17:30 de Salona Kombîyayîşî ya Alî Emîrîyî ya Şaredarîya Amedî ya Şaristanê Girdî de do bêro viraştene. Akerdişî de Hemşaredara Şaredarîya Amedî ya Şaristanê Girdî Serra Bucak, Hemserekê Pêroyî yê DEM Partî Tuncer Bakirhan, sîyasetmedar Veysî Aktaş, Meclîsê Mayanê Aştîye ra Hatice Yaşar, Walîyê Duhokî Dr. Ali Tatar, Walîya Helebceyî Nuxsha Nasih Ahmed û akademîsyene Dr. Ozgur Sevgî Goral do qisey bikerê.
Çalakîyê ke do meşte bêrê viraştene
Roja verêne ya forumî de xeylêk panel, qiseykerdiş, atolye û çalakîyê kulturî do bêrê viraştene. Bernameyê 12ê gulane de çalakîyê "Pîya: Bernameyê Kultur, Dîyalog û Piştîdayîşî", "Pedagojîya Rexneyî seba Aştîya Komelkîye, Edaletê Sosyalî û Azadîya Kolektîfe", "Bingeyî ra Pîya Pratîkanê Aştîye Berhem Ardene", "Kurdî 2.0 - Hîkaye ra ver Bi Tatbîqî, Dewe ra Ver bi Dîaspora", "Plansazî de Çîyê Nedîyaran Eşkera Kerdene", "Beşdarîya Cinî Prosesê Aştîye de û Seypênêbîyayîşê Cinsîyetê Komelkî", "1990an ra heta Ewro: Kurdistan de Koç, Vîr û Cigêrayîşê Pîyaciwîyayîşî", "Ganê Amîda: Tam û Vîr", "Aştî û Hêvî: Muzîkê Komelkî", "Dêsê Aştîye yê Gedeyan", "Mîzah û Azadî: Bi Huyayîş Sînorê Fikran Keşf Kerdene", "Futbolê Kuçeyî yo Pêroyî", "Bingeyê Hiqûqî yê Aştîye: Qanûnê Bingeyî û Pêameyîşê Komelkî", û "Konsera Akerdişî - Ma Music" do bêrê viraştene.
Çarçewaya bernameyî de sewbîna nîşandayîşê tîyatroyan, dengbêjîyê muzîkî û têhetameyîşê kulturî yê cîya-cîyayî do bêrê organîzekerdene. Çalakîyî cayanê kultur û hunerî yê cîya-cîyayan ê Amedî de do bêrê viraştene.
Bernameyê forumî ke bi amancê averşîyayîşê dîyalogê komelkî, xurtkerdişê kulturê cuya pîyaye û komelkîkerdişê aştîye yeno organîzekerdene, taqwîmê çalakîyan, adresa https://www.peaceandfreedomforum.com/tr/anasayfa ra eşkenê bêro ewnîyayene.