Rêxistina Heqanê Merdiman a Hengawî, raporê xo derheqê çalakîyanê Îranî de pare kerd. Goreyê raporî, leşkeranê Îranî mîyanê yew hefteyî de tewr tay 17 kesî kiştî. Hêrişanê vizêrînan ê bajarê Îlamî de zî 4 Kurdî ameyî kiştiş. Bajarê Farsanî de zî yew cinîya cîwane ameye kiştiş.
Bajaranê Kirmanşan, Loristan, Hemedan, Fars, Îlam, Çarmihal û Bextîyarî û herêmanê Malekşahî, Hersîn, Nûrawad (Delfan), Kûdeşt, Azna, Lordegan, Fûladşahr û Marvdeştî de 8 rojî yo ke çalakîyî dewam kenê. Çalakîyan de nezdîya 600 welatîyî ameyî destbendkerdiş.
Xeylê bajaranê Rojhelatê Kurdîstanî û Îranî de çalakîyê vera krîzê ekonomîkî 8 rojî yo dewam kenê. Leşkeranê rejîmê Îranî çalakîyan de bi guleyan hêrişê çalakgeran kerd. Leşkeranê Îranî, bajaranê Badre, Dere Şar û Serpêl-Zehawî de tewr tay 12 welatîyê Kurdî girewtî.
Îlam de 4 welatîyî ameyî kiştene
Bajarê Îlamî de zî hêrişê leşkeranê Îranî de 4 kesî ameyî kiştene. Muhafizanê Şorişî yê Îranî bajarê Îlamî de guleyî eştî çalakgeran ser. Hêriş de 4 welatîyê Kurdî merdî.
Hengaw: 17 kesî ameyî kiştiş
Hengawî zî rapora çalakîyanê hefteyêkî pare kerd û eşkera kerd ke çalakîyan de 17 kesî ameyê kiştene. Goreyê raporî, mîyanê hefteyêkî de tewr tay 17 kesî ameyî kiştene.
Leşkeran Farsan de cinîyêka cîwane kişte
Hetê bînî ra, leşkeranê rejîmê Îranî qezaya Farsanî ya Îranî de guleyî eştî çalakgeran ser. Hêriş de cinîya cîwane Sâger Etemadî weşîya xo vîndî kerde.