Mesut Kızmazî rê, yo ke Dîyarbekir de par wexto ke înan xeber teqîb kerdêne bi hawayo fîzîkî û bi qiseyan hêrişê Temsîlkarê Rudaw TV Maşallah Dekakî û kameraman Mehmet Kanevî kerd, ey rê 7 aşmî û nêm ceza amey birînayîş.
Roniştişê dewaya qerarî ya ke derheqê Kızmazî de bi sûcanê "heqaret" û "tehdît"î amebî akerdene, Mehkemeya Cezaya Eslîye ya 19. ya Dîyarbekirî de virazîya. Mehkeme, sûcdar Mesut Kızmazî rê sûcê "tehdît"î ra 5 aşmî, sûcê "heqaret"î ra zî 2 aşmî û 15 rojî ceza birîna.
Ceza nêamey taloqkerdiş
Seba ke derheqê sûcdar Mesut Kızmazî de bi sûcanê "birîndarkerdiş", "ticaretê maddeyan", "tehdît û heqaret"î ra 4 dewayê bînî estbîyî, ceza taloq nêbî. Avûkate Rahşan Bataraye waşt ke wa sûcdar sûcê "teşwîqkerdişê şarî seba kîn û nefretî" ra zî bêro cezakerdene, la mehkeme no waştiş qebul nêkerd.
Trabzon ra tewrê roniştişî bi
Sûcdar Mesut Kızmaz, Trabzon ra ke seba karî şîbi, bi metodê SEGBİSî tewrê roniştişî bi.
Çi qewimîyabî?
Par aşma Çeleyî de qezaya Sûrî ya Dîyarbekirî de, Maşallah Dekak û kameraman Mehmet Kanevîyo ke zîyaretê Serekê Pêroyî yê Partîya DEVA Alî Babacanî teqîb kerdêne, maruzê heqaret û tehdîtanê Mesut Kızmazî mendbî. Kızmazî, bi vateyanê "Tîya Komara Tirkîya ya, şima do tîya de bi Tirkî qisey bikerê, aqilê xo bîyarê sereyê xo" hewl dabi ke bi hawayo fîzîkî hêrişê rojnamegeran bikero.
Serekê Cemîyetê Rojnamegeran ê Başûrê Rojhelatî (GGC) Felat Bozarslanî zî roniştiş teqîb kerd.