Fermandarê Pêroyî yê Hêzanê Sûriyeya Demokratîke (HSD/DSG) Mazlûm Abdî eşkera kerd ke înan hukmatê Sûriye reyde semedê babê yewbîyayîşê (entegrasyon) leşkerî, pawitişê sînnorî û îdarekerdişê çimeyanê bine erdî de pê kerdo.
Abdî, kombîyayîşê "Heyetê Şêwirmendî yê Komîteya Muzakere ya Îdareyê Xoserî" ke bajarê Tebqa yê Rojavayê Kurdistanî de ame viraştene de qisey kerd û îfade kerd ke muzakereyanê ke bi îdareyê Şamî reyde yenê domnayene de averşîyayîş bîyo. Abdî da zanayîş ke babê yewbîyayîşê hêzanê leşkerî, pawitişê sînoranê welatî û îdarekerdişê petrol û çimeyanê bîn ê xozayî ser esasê 'mulkê heme Sûriyeyijan' de averşîyayîş bîyo.
Goreyê Ajansê Xeberan yê North Pressî, Mazlûm Abdîyo ke bi mesajê vîdeoyî tewrê kombîyayîşî bi wîna va: "Ma babeta yewkerdişê hêzanê leşkerî de goreyê menfiatanê pêroyî, Şamî reyde resayê fehmêkê muşterekî."
Abdî da zanayîş ke îdarekerdişê çimeyanê binerdî bi prensîbê "Mulkê heme Sûriyeyijan o" ameyo destgirewtene. Ame vatene ke no nêzdîbîyayîş do prosesê newe ra awankerdişê Sûriye de rolêkê muhîm kay bikero.
Abdîyo ke kombîyayîş de qisey kerd, va "Ma hêvî kenê ke demanê vernîya ma de, ma do heme maddeyan ser o biresê pêkerdişêk " û derheqê prosesî de mesajêko pozîtîf da.