Bilhuda Doğan Çit
Şubeyê Eğitim-Sen ê Çolîgî semedê serra 2024î teqwîmêk pêroyê ci bi Zazakî hadre kerd.
Serekê Sendîkaya Eğitim-Senî yê Murat Korlaelçiyî derheqê prosesê vetişê Teqwîmê înan û xebatanê înan ê semedê ziwan û kulturî de Zazakî Newsî rê qisey kerd.
Murat Korlaelçiyî derheqê Teqwîmê Egitim-Senî yê serra newîye yo bi Zazakî de va ke; “ Raşta ci teqwîmê ma raştê eleqeyêko weş ameyo. Tede tena nameyê aşman û rojan çin ê. Tede derheqê hedîseyanê tebîatî û cuya rojane ya Kurdan de malumatî estê. Ma verê cû bi vatişkî nê çîyî pêhesyabî. La ma nika teqwîmê xo de zî ca da nê çîyan ke wa vînî nêbê. Ma wazenê verî nê teqwîmê xo biresne mamosteyê ke bi Kirdkî (Zazakî) mekteban de derse danê. Ma qayîlê wa nê teqwîmê ma keyeyê her kesî de aliqnayî bo.”
Ma Murat Korlaelçiyî ra pers kerd ke, Çolîg cayo ke Kirdî tede zaf cuyenê ê cayan ra yew o la qiseykerdişê Kirdkî roje bi roje kêmî beno. Sebebê ney çi yo? Û ma nê cewabî girewtî.
“Çend feqtorî estî ke ziwanî ser o tesîrê xo kenê. Bedilyayîşê kulturî, komelkî û îkdîsadî tesîrê xo ziwanî ser o zaf kenê. Heto bîn ra polîtîkayê dewlete, sîstemê perwerdeyî û medya, qiseykerdişê Zazakî ser o tesîr kenê.
Goreyê mi tay sebebî nê yê;
-Minaqeşeyê Ziwan- lehçe
-Semedo ke ziwan, nêbîyo ziwanê bazarî
-Semedo ke sîstemê perwerdeyî yê Tirkîya de tena 2 saetî derse dîyeno û ziwan bi temamî perwerde de ca nêgêno
-Semedo ke keyeyan de ziwanê ma hînî qisey nêbeno
-Platformanê dîjîtalan de kêmîbîyayîşê Zazakî
Ma tîya de tena behsê çend tespîtanê rojaneyan kenê. Xeylê raporê ma estê ke hevalê ma derheqê na mesela de hadre kerdê.
Murat Korlaelçiyî îzah kerd ke, çend falîyetê înan estê hem bi Zazakî hem bi Kurmanckî yê û wîna dewam kerd. “Ma tuzugê xo de zî ca dayo Kurdkî. Semedo ke wa mekteban de dersa Kurdkî ya weçînitî bibo çar saete, ma raporêk hadre kerdo. Kursê ma yê ziwanî dewam kenê. Ma yew koma muzîkî awan kerda. Ma kursê erbane û sazî akerdo. Yewna xebata ma semedê Tîyatroyî esta. Ma yew grûba tîyatroyî awan kerda. Grûba Tîyatroyî bi rayberîya Yunus Çiftçi cuya Ahmet Arifî ser o kayêk hadre kerd. Nameyê kayî “Filinta Arif” o û ma do demêko kilm de hadre bike.
Teqwîmê bi Zazakî yê Eğitim-Sen ê Çolîgî nika ra raştê eleqeyêko weş ameyo.
Teqwîm platformanê dîjîtalan ser o ameyo vilakerdiş û kesê ke biwazê eşkenê PDFyê ci bîyarê war û fotokopîyê ci bivejê. La sendîka hetêk ra zî wazena wa semedê hetkarîya Sendîkaya Eğitim-Sen ê Çolîgî sendîka ser ra teqwîm bêro waştiş.
Kesê ke wazenê teqwîmî bivînê û biwanê eşkenê nê lînkî ser ra biresê ci
Zazakî News
Çolîg (Bingöl)
