Buroyê Huqûqî yê Seserre mesajê Rayberê PKKyî Abdullah Ocalanî yê derheqê "heqê hêvîye" û awankerdişê aştîye de eşkera kerd.
Buroyê Huqûqî yê Seserre (Asrin) eşkera kerd ke Rayberê PKKyî Abdullah Ocalanî pêvînayîşê xo yê bi avûkatan reyde vato, "Prensîbê hêvîye, gameya ke ganî dewlete bierzo ya."
Buroyê Huqûqî yê Seserre, derheqê pêvînayîşê avûkatan ê 13ê Teşrîna Verêne ya 2025î yê bi Abdullah Ocalanî û mehkûmanê bînan ê Zîndanê Îmraliyî reyde, eşkerayîyêka nuştekîye weşana.
Eşkerayîye de ame vatene ke pêvînayîş de derheqê rewşa mehkûman û statuyê înan ê huqûqî de agahîyî ameyê parekerdiş û fikrê Ocalanî yê derheqê awankerdişê aştîye de seba raya pêroyî ameyî parekerdiş.
Ame vatene ke pêvînayîş de, rewşa huqûqî ya Abdullah Ocalanî çarçeweyê qerarê "heqê hêvîye" yê Mehkemeya Heqanê Merdiman a Ewropa (MHME) de babetanê serekîyan ê munaqeşeyî ra yewe bîye.
Komîteya Wezîran a Konseya Ewropa, roniştişê xo yê 15-17ê Îlone de reyna veng dabi Tirkîya û waştibi ke "heqê hêvîye" goreyê qerarê MHME bi çareserîyêka qanûnî bêro garantîkerdiş.
Ocalanî na babete ser o, bale ante serê muhîmîya "prensîbê hêvîye" û rasterast vato:
"Prensîbê hêvîye, gama ke ganî dewlete bierzo. Ganî nê barî wedaro. Na yew meseleya ke tesîrê hezaran kesan kena. Kamcîn het ra ke ti biewnîyê, ganî no bêro wedaritene. Hetê huqûqî ra ganî no bêro kerdene. Sîyaset û edalet zî ney wazenê."
Ocalanî ardo vîrî ke senî ke vengdayîşê 27ê Sibate yê seba Komelêko Aştîwaz û Demokratîk de ame vatene, ganî her kes bieşko bawerî û neteweyê xo bi azadî îfade bikero û biciwîyo.
Goreyê eşkerayîye, Ocalanî her îfade kerdo ke ganî Kurdî bi pêroyî mîyanê huqûqî de ca bigîrê û aştîya raşte na ya.
Ocalanî ard ziwan ke hetanî ewro huqûqê Kurdan ame peytgoşkerdene la ganî ewro huqûqêko entegrasyonê demokratîkî bêro awankerdene.
Abdullah Ocalanî veng da o kesanê ke wazenê ey fam bikerê ke wa prosesê aştîye û komelê demokratîkî hîna kûr bikerê û tewrê nê prosesî bê.