ZAZAKÎ NEWS – Şubeyê Dîyarbekirî yê Komela Huqûqnasan a seba Azadîye (OHD), bi muracatnameyêko fermî muracatê Serekîya Karûbaranê Dînî ya Tirkîya (Dîyanet) kerd û waşt ke xutbeyê roJa îne bi ziwanê Kurdkî (Zazakî-Kurmanckî) zî bêrê dayîş.
Dîyanetî 15ê Tebaxa 2025î de pelê xo ya înternetî yê fermî ser o bi 8 ziwananê xerîban (Tirkî, Erebkî, Îngilîzkî, Rûskî, Almankî, Îspanyolkî, Fransizkî û Îtalyankî) xutbeyî weşanayî la ziwanê Kurdkî mîyanê înan de çin bi.
Muracatnameyo ke ewro Şeme (30.08.2025) ame dayîş de, ame destnîşankerdiş ke bi mîlyonan hemwelatijanê Tirkîya ziwanê înan ê dayîke Kurdkî yo û yew qismê înan tena bi Kurdkî zaneno.
OHDyî bal ant ser o ke gerek xizmetê Dîyanetî pêro hemwelatijan bi hawayêko seypê bikero û seba ney, dayîşê xutbeyanê Kurdkî “hewceyîyêka qanûnê bingeyênî” û yew şerto mecbûrî yo, seba ke hemwelatijî bieşkê xizmetanê dînîyan ra îstîfade bikerê.
Komelê îfade kerd ke ke herçiqas qebulkerdişê xutbeyan bi ziwananê cîyayan gameka muhîme bo zî, “wexto ke na game ziwanê dayîke yê bi mîlyonan hemwelatijan teber de verdena, nêresena armancê xo.”
OHDyî peynî de waşt wa ziwanê Kurdkî bi zaravayanê ci yê Kurmancî û Zazakî de zî xutbeyî bêrê dayîş.