Abdullah Zeydano ke sey Hemşaredarê Bajarê Girdî yê Wanî amebi weçînayene, mazbataya ey amey betalkerdiş û mazbata dîya namzetê Ak Partî.
Komeleya Huqûqnasan a Seba Azadîye (OHD) da pêhesnayîş ke Heyetê Weçînayîşî yê Bajarî yê Wanî mazbata daya namzedê AKPyî Abdulahat Arvasî.
Eşkerayîye de ame vîrvistene ke Abdullah Zeydan Wan de se ra 55 rayî girewtî û hukmatîbi talîmatê sîyasîyî îradeyê şarî xesp kerd. OHDyî vat, ganî huqûqnasî û heme rayapêroyîya demokratîke vera na bêhuqûqîye vengê xo berz bikero.
Wan de namzedanê DEM Partî Abdullah Zeydan û Neslihane Şedal sera 55,48 û namzedê AKPyî Arvasî sera 27, 15 raye girewtî.
DEM Partî: Wa her kes vera darbe paştî bido şarê Wanî
Hemserekanê Pêroyî yê DEM Partî Tulaye Hatimogullari û Tuncer Bakirhanî verê Heyetê Weçînayîşî yê Berzî ra veng da ke wa her kes vera darbe vengê xo berz bikero û paştî bido şarê Wanî.
Hemserekanê Pêroyî yê Partîya Demokrasîyî û Têdûştîye ya Şaran (DEM Partî) Tulaye Hatimogullari û Tuncer Bakirhanî verê Heyetê Weçînayîşî yê Berzî (YSK) de beyanat day.
Bakirhanî vat: ''Na derbeya sîyasîye ya. Darbe verî bi destê qeyûman ameyêne kerdene, nika bi destê hukmî û qanûnî yeno kerdene. Ma do destûr medê ke ê bi nê kayan îradeyê şarê Wanî çarçur bikerê. Serekkomarî hema vizêr vatêne ê do îradeyê şarî rê, netîceyanê sindoqan rê hurmet bikerê. Di rojan de se bi, çi bedilîya?
Vera na darbe de heme kurdî û şarê Tirkîya do bêveng memanê. Ma na darbe qetî qebûl nêkenê. Vera na bêhuqûqîye ma semedê paştdayîşî veng danê. Na têna meseleya DEM Partî nîya. Tirkîya de meseleya her kesî ya ke wayîrê wîjdanî yê û demokrasî wazeno. Ma veng danê heme partîyanê sîyasîyan, rêxistinanê demokratîkî û heme kesanê hîsdaran ke wa vera darbeya sîyasîye paştî bidê şarê Wanî"
