ZAZAKÎ NEWS -Aktîvîteya ke salonê resepsîyonî yê Avesta / Culture yê Sûrî de amey kerdiş rê xeylêk kesî tewrê ci bîyî. Çalakîye de Malmîsanijî va ke: “Qîmetê ziwanî, her ke şino hîna weş fehm beno. Seba xebatanê mi yê pawitiş û averberdişê Zazakî, mi zaf zehmetî dîyî. Tepiştiş, tewqîfkerdiş û tewr peynî zî sürgün... La nika, vînayîşê nê ziwanî û pawitişê ziwanê dayîke mi zaf şa keno. Ez sipasîya xo pêşkêşê şima kena ke şima şewêka winasî amade kerde û ameyî tîya.”
Çalakîye, bi îmzakerdişê kitabanê Malmîsanijî û sohbetkerdişê pîya bi beşdaran dewam kerde.
Malmîsanij o ke serra 1952î de qezaya Pîranî ya Dîyarbekirî de ame dina, bi xebatanê xo yê ke nêzdîyê nêm seserre yo rayra beno, mîyanê nameyanê tewr muhîman ê edebîyatê Zazakî de ca gêno.
Ey wendişê xo yê verên û mîyanên Dîyarbekir de temam kerd, wendişê xo yê berzî zî Fakûlteya Îlahîyatî ya Unîversîteya Anqara de kerd. Mabênê serranê 1975-1981î de seba sebebanê sîyasîyan hîrê reyî ame tewqîfkerdiş, dima ke lîse û mektebanê mîyanênan de sey mamosteyî xebitîya, serra 1982î de şi Sewêd de. Uca de ziwananê Îranîyan ser o xebatî kerdî û masterê xo Unîversîteya Göteborgî de temam kerd.
Malmîsanijî, mabênê serranê 1979-1980î de kovara Tîrêjî ya ke Tirkîya de kovarêka verêne bî ke seranser Kurdkî ameyî weşanayîş, bi kurmanckî û Zazakî weşana. Serra 1987î de zî bi amadekerdişê ferhengê verên yê Zazakî-tirkî, xebatanê ziwanî de bi sebebê babetêka rûmetdare.
Peyênê seserra 19ine û destpêkê seserra 20ine de bi nuştişê di mewlûdan ra dima, nêzdîyê nêm seserre bi ke Zazakî- kirmanckî tu eserêko nuştekî nêame amadekerdiş. Seba naye Malmîsanij, serranê 1970î de sey yew wezîfedarê verên yê ke bi Zazakî eserî amade kerdî, yeno qebulkerdiş. Nuştoxê ke fariskî û tirkî ra hîkayeyî çarnayî Zazakî, mewlûdê Ehmedê Xasî û Usman Efendîyê Babîjî herfanê erebîyan ra çarnayî herfanê latînîyan û bi nê hawayî neslê neweyî bi nê eserî resayî têhet.
YEW EMIRO KE BI WAYÎRVEJÎYAYÎŞÊ ZAZAKÎ VÎYART
— Zazakî News (@zazaki_news) June 14, 2026
M. MALMÎSANIJ...
Wa 50 serra nuştoxîya M. Malmîsanijî pîroz bo.
Ma kede, xebate û renca ey xo vîrî ra nêkenê... pic.twitter.com/4Xv5DEeX6o
Eserê Malmîsanijî çarayî erebî, fariskî, swêdkî û tirkî; tayê şîîrê ey zî bi îngîlîzkî, fransîzkî û swêdkî ameyî weşanayîş. Mabênê serranê 1995-2001î de wezîfeyê serekîya Komeleya Nuştoxanê Kurdan ya Sewêdî rayra berd, eynî wext de endamê Yewbîyayîşê Nuştoxanê Sewêdî yo.
Malmîsanijî kovaranê Tîrêj, Hêvî, Armanc, Çarçira, Wan û Çîra de redaktorîye kerde, serra 2003î de kovara Vateyî ya ke Îstanbul de ameyî weşanayîş de zî sey serekredaktorî wezîfe gîrewt.