ZAZAKÎ NEWS - Taximanê Trendyol 1. Lîgî ra Amedspor, seba vejîyayîşê Süper Lîgî Îdir de do vejîyo musebaqayêka muhîme. Erzurumsporî ra dima taximo dîyin o ke do rasterast vejîyo Süper Lîg, 2ê Gulane roja şeme musebaqayanê hefteyê peyênî ra dima do aşkere bibo.
Amedsporo û Erokspor nika wayîrê 73 pûanan ê. Musebaqaya nêmê ewilî de Amedsporî Amed de 2-1 qezenc kerdbi û Îstanbul de zî musebaqa 1-1 qedîyabî. Seba ke muqayeseyê mabênê her di taximan de Amedspor vernî de yo, eke Amedspor vera Îdir FK hîrê pûan bigîro vejîyeno Süper Lîg.
Amedsporî eke na musebaqa bigîro, do tarîxê xo de reya verêne vejîyo Süper Lîg. Amedspor wextê 2023-2024î de Lîga 2. Grûba Sûr de bîbî şampîyon û vejîyabî Lîga 1. Amedspor sezonê verênî de rêza 9. de musebaqayî qedînabî, labelê nika tena yew game Süper Lîgî ra dûrî vindeno.
Na musebaqaya krîtîke ra verî Amedspor de direktoro teknîkî bedilîya. Rayberîya klûbî badê erşawitişê Mesut Bakkalî, Sertaç Küçükbayrak seba na wezîfeye aşkere kerd. Sezonî mîyan de direktoranê teknîkî Mehmet Altıparmak û Sinan Kaloğlu reyde zî rayîrî ameybî cîyakerdiş.