Rojnamegere Nagehan Alçî îdîa kerd ke Hemserekê verênî yê Partîya Demokratîke ya Şaran (HDP) Selahattîn Demîrtaş, yo ke 9 serrî yo ke tepişte yo, do no hewte bêro veradayîş.
Alçî, hesabê xo yê X'î ser o nê vateyî nuştî:
"Ez ewnîyena vizêr ra nata yeno qiseykerdene… Goreyê agahîyanê ke çimeyanê mi yê baweran ra resayê mi, Selahattîn Demîrtaş do mîyanê nê hewteyî de bêro veradayîş.
Na îdîa, dima ke Mehkemeya Heqanê Merdiman a Ewropa (MHME) qerarê derheqê Demîrtaşî de qetî kerd û sîyaset de nîqaşê "veradayîşî" dest pêkerd, ameye rojdem.
Mehkemeya Heqanê Merdiman a Ewropa (MHME) qerar dabi ke heqê Demîrtaşî ameyê binpaykerdiş û waştibi ke wa bêro veradayîş. Tirkîya vera nê qerarî de îtîraz kerdbi, la MHME nê îtîrazî red kerd û bi no hawa qerarê veradayîşî qetî bi.
Dima ke no qerar ame dayîş, avûkatanê Demîrtaşî seba tehliyeya muwekîlê xo muracatê Mehkemeya Îstînafî kerdbi.
Pawîyeno ke mehkemeya Tirkîya nê rojan de derheqê Demîrtaşî de qerarê xo bido.
Wezîrê Edaletî Yilmaz Tunçî zî eşkerayîyêka kerdbî û vatibi ke qerarê MHME resayo înan û nika ercnayîş hetê mehkemeya herêmî de yo, û ganî pabeyê qerarê mehkeme bê.
