Dr. Selçuk Mızraklıyo ke dima weçînayîşê Şaredarîya Bajarê Girdî ya Dîyarbekirî 5 mengan ra pey cayê ey rê qeyûm ame tayînkerdene û ame destpêkerdene, cezaya ke dadgehe dabî ci qedêna. Mızraklıyo ke pîya bi Selahattin Demirtaşî eynî zîndan de mendêne, ewro Zîndanê Padaye yê Edirne ra veradîya.
Vejîyayîşê zîndanî de cinîya ey Zeynep Mızraklı, Wekîlê Grûba DEM Partî Sezai Temelli, Saruhan Oluç û Gülistan Kılıç Koçyiğit, Qiseykera DEM Partî Ayşegül Doğan, Mebûsê Dîyarbekirî Serhat Eren û Cengiz Çandar zî tede xeylêk kesan Mızraklı pêşwazî kerd. Zeynep Mızraklı zewcê xo yo ke nêzdîyê 7 serran zîndan de ame tepiştene bi vilikan pêşwazî kerd.
Wesayîtanê ke verê zîndanî de pawitêne ser o afîşanê sey ‘Xoserîye nêmce nêbena, Demirtaşî rê azadîye’ û ‘Azadîya Mızraklîyî şadîya ma ya, tepişîyayîşê Demirtaşî hêrsa ma yo’ bal ante xo ser.