Mehkemeya Cezaya Aslîye ya 14. ya Mêrsînî de dewaya Selahattîn Demirtaşî ameye vînayîş. Demirtaşo ke Zindana Edîrne de yo, nêame mehlema, labelê avukatê ey salon de hazir bi.
Hakimî qerar da ke dosyaya ke Mêrsîn û Amed de "Heqaretê Serekkomarî" ra ameybî akerdene, bêrê yewkerdiş. Labelê waştişê yewkerdişê dosyayanê Enqere û Mêrdînî ame redkerdiş.
Dozgerî 'ceza' waşte
Dozgerî mutalaaya xo ya esasî pêşkêş kerde. Dozgerî waşt ke Demirtaş sucê "Heqaretê Serekkomarî" ra 1 serre û 3 aşman ra heta 7 serran cezaya hepisî bigîro.
Avukatê serekkomarî îtîraz kerd û waşt ke ceza seba her fealîyetî cîya-cîya bêro dayîş.
Avukatê Demirtaşî seba ke vera mutalaa de pawitişê xo amade bikero, wext waşt. Hakimî dewa taloqê 6ê Çileyî kerde.