Qezaya Sêwrege ya Rihayî de komxebata Zazakî ya Herêma Tolhildanî amey viraştiş. Komxebat, rayberîya Platformê Dezgehanê Demokratîkan de bi sloganê “Kurdkî rê statu, bi kurdkî perwerde” bînaya Ziwan Kurdî de virazîya û zaf kesî tewrê ci bîyî. Komxebat Zazakî-Dimilî amey virazîya.
Çalakwanê ziwanê kurdkî û nuştox Rifat Ronî, moderatorîya komxebate kerde. Perwerdekare Ferîde Akturan û avukate Cemîle Turhalliye zî sey qiseykerdoxî tewrê ci bîyî.
Ferîde Akturane qiseykerdişê xo de bale ante babeta “Perwerde û zafziwanîye” ser û destnîşan kerd ke perwerde seba cuyayîşê yew ziwanî zaf muhîm o. Akturane îfade kerd ke ganî ziwanê kurdkî bibo ziwanê perwerdeyî.
Roniştişê dîyinî yê komxebate de îdarekara Komeleya Edebîyatkaranê Kurdan Stran Yaşar moderatorîye kerde û perwerdekar Firuzan Demîr, Hemserekê Komeleya Edebîyatkaranê Kurdan Hacî Ozkal û nuştox Ehmedê Bira zî sey qiseykerdoxî amade bîyî.
Hacî Ozkal babeta “Vizêr, ewro û ameyoxê ziwanî” ser o qisey kerd.
Firuzan Demîr zî babeta “Seba ke domanî ziwanê dayîke bimusê, teşwîqê medyaya dîjîtale” ser o vindert û ard ziwan ke zazakî roje bi roje çîne bena. Aye waşt ke wayîrîya Zazakî bêro kerdiş û vat ke seba wayîrvejîyayîşî zî lazim o ziwan bêro musnayîş û vilakerdiş.
Nuştox Ehmedê Bira zî tewr peynî de qisey kerd û babeta “Weşan û medya” ser o yew pêşkêşîye kerde.