Bajaranê Sûrîye de bi hezaran Elewîyî seba protestokerdişê hêrişanê peyênan vejîyay kuçeyan. Çalakîkeran hem hêrişê mezhebî şermezar kerdî hem zî seba herêmê xo 'sîstemê federalî' waşt.
Bajarê Lazqîye û tayê herêmanê bînan ê Sûrîye ke nifusê înan zafêr Elewî yê, bi hezaran kesî vejîyay kuçeyan. Şarî hêrişê peyênî yê ke vera cematê înan ameyê kerdene, şermezar kerdî.
Çalakîyî, badê ke Hims de cinî û camêrdêk amey kiştene, dest pêkerdî. Nê hedîseyan cematê Elewîyan mîyan de bi sebebê reaksîyonêko pîl.
Çalakîkeran sloganê sey "Şarê Sûrîye yew o" û "Şarê Elewî sere nêroneno" berz kerdî.
Tayê çalakîkeran waşt ke tepişteyî bêrê veradayene û komê çekdarî herêmê înan ra vejîyê. Goreyê Teşkîlatê Heqanê Merdiman a Sûrîye (SOHR), nêzdîyê 9 hezar leşkerê verênî yê îqtîdarê Esadî hema zî zîndanan de yê.
Waştişê Federalîzmî
Ancî, tayê aktîvîstan seba herêmanê Sûrîye sey Hims, Hema û Tartusî, ronayîşê sîstemêkê federalî waşt. Ame zanayene ke bajarê Ceble de mabênê çalakîkeran û eskeranê hukmatî de alozî vejîya.
Hetê bînî ra Wezaretê Karanê Zereyî yê Sûrîye eşkera kerd ke kişîyayîşê Himsî sebebanê mezhebîyan ra nê, sucêko adlî yo û ê hurmet nîşanê fikranê aştîyane danê.