Terteleyê Dêrsimî de, goreyê reqamanê fermîyan 13 hezar û goreyê çimeyanê xoseran ra zî 70 hezar kesî ameybî qetilkerdiş. Nê qirkerdişî ser ra 88 serrî ravêrtî. Dima qirkerdişî, bi îdîaya ke “serekê serewedaritişî yo” derheqê Seyîd Rizayî de qerarê îdamî ame dayîş. Serrê lajê ey Reşik Ûşenî yê 16 serrî zî gird kerdî û o zî pê pîyê xo îdam bi. Seyîd Riza, lajê ey Reşik Ûşen, Ûşenê Seydî, Aliyê Mirzî Silî, Hesenê Îvaîmê Qijî, Hesen Axa û Findik Axa Meydanê Genimî yê Xarpêtî de ameyî daliqnayîş. îdamkerdişê înan ser ra 88 serrî vîyartê la hema zî cayê mezelanê înan nêameyo eşkerakerdiş.
‘WA CAYÊ MEZELÊ EY BÊRO MOJNAYÎŞ’
Torna Seyîd Rizayî Zelîha Polate waşt ke cayê mezelê kalikê aye û embazanê ey bêro eşkerakerdiş û wina va: “Hema zî na mesela de gamêk nêameya eştiş. Eke bi zerrî yê, wa game bierzê. Wazenê ke ê terteleyî bi ma bidê vîrkerdiş. Nê rojan de behsê aştîye beno û no çîyêko weş o, la ê bi zerrî nîyê. Ma zaf dejî antî û êdî ma wazenê ke nê dejî êdî nêrê antîş. La hêvîya mi çin a.”
Zelîha Polate da zanayîş ke dewlete, cayê mojnayîşê mezelan û rî bi rî bîyayîşî de, çîyanê ke terteleyî anê vîrê merdimî, înan çin kena û wina dewam kerd: “Şina çira cayê mezelanê ma nêmojnenê ma,? Şima ser o nameyê dewa ma zî wedarna. Cayo ke nêmeyê mezelanê ma uca de bî, kerdî malê xezîneyî.”
Çime: MA
