Veradayîşê girewteyê nêweşî yê 73 serre Mehmet Saît Yildirimî yo ke Zîndanê Tîpê F yê Nimre 1î yê Kiriklarî yê Îzmîrî de yeno tepiştiş, reya 3. ame astengkerdiş. Veradayîşê ey, waştişê Heyetê Îdare û Kontrolî yê Zîndanî ser o, bi bahaneyanê ke "bi ziwanê rêxistine" qisey kerdo, "halê ey baş nîyo" û "poşmanîye nîşan nêdaya", 9 aşmî ame peyeştiş.
Pawîyêne ke Yildirim o ke 31 serrî yo zîndan de yo, 27ê Sibata 2025î de bêro veradayene. Labelê heyetî veradayîşê Yildirimî eşte 27ê Kanûne. Çend rojî verê veradayîşî, heyetî na rey veradayîşê ey eşte 25ê Tebaxa 2026î. Îtîrazê awqatan zî ame redkerdene.
Birayê Yildirimî, Selîm Yildirimî Ajansê Mezopotamya rê qisey kerd û vera qerarî reaksîyon nîşan da û va ke huqûqê dişmenîye Kurdan ser o dewam keno. Yildirimî bale ante ser ke no nêzdîbîyayîşê dewlete yo vera girewteyanê nêweşan, bawerîya bi prosesî pûç keno û waşt ke wa girewteyê nêweşî bêrê veradayene.
Yildirimî va ke îdareyê zîndanî seba astengkerdişê veradayîşî bahaneyanê neweyan vejeno û wina va: "Birayê mi 30 serrê xo temam kerdî. Ganî 27ê Sibate de bêro veradayene, la bi bahaneya ke 'poşmanîye nîşan nêdaya' û keyeyê xo reyde 'bi ziwanê rêxistine' qisey kerdo, veradayîşê ey ame astengkerdene. Îddîa kenê ke qiseykerdişê telefonî yê heftane de 'bi ziwanê rêxistine' qisey kerdo... Semedo ke qiseykerdişê bi birayê xo de vateyanê Seyîd Rizayî xebitnayê û keyeyê xo 'organîze kerdo' veradayîşê ey newe ra ame astengkerdene."