ZAZAKÎ NEWS - Rojnameger Enver Ayseverî yew weşanêkê xo yê medyayê sosyale de vatbi, "Rastgerîye sûc a. Wexto ke şima rastger benê, şima benê bêexlaq yan zî exlaqê şima beno bêexlaqîye." Serê nê vateyanê ey, derheqê ci de bi sûcê ‘şar seba kîn û dişmenîye tehrîkkerdiş yan zî tehqîrkerdiş’ tehqîqat amebi dest pêkerdiş.
Aysever, hedîse ra dima 11ê Kanûna 2025î de amebi dest bendkerdene û erzîyabi hepisxane.
Rojnameger Enver Aysevero ke seba vateyanê xo yê hesabê medyayê sosyale bi sûcê 'şar seba kîn û dişmenîye tehrîkkerdiş'î heta 3 serran cezaya zîndanî (hepsî) seba ey ameyêne waştiş, ewro vejîya verê mehkema.
Mehkeme, seba Ayseverî 10 aşmî cezaya zîndanî birna. Labelê ceza amey taloqkerdiş û derheqê Ayseverî de qerarê tehliyeyî ame dayîş.
