ZAZAKÎ NEWS - Netîceyê Musebaqaya Xelatanê Rojnamegerîye ya Mûsa Anterî û Şehîdanê Çapemenîya Azade ya 31. ame eşkerakerdiş; beşê xebera Kurdkî de tu berhem layîqê xelate nêame vînayîş.
Xelatî, do 20ê Êlule de saete 18:00 de Merkezê Kulturî yê Cem Karacayî yo ke Bakirkoyê Stenbolî de yo, bi merasîmêk bêrê dayîş.
Musebaqa waranê “Xebera Tirkî”, “Xebera bi Dîmen”, “Xebera Kurdkî”, “Fotograf”, “Karîkatur” û “Rojnamegerîya Cinîyan” de amey viraştiş.
Beşê Xebera Kurdkî
Endamanê jurî yê ke Sîma Bîroke, Munever Karademîr, Îdrîs Kara, Bişar Durgut û Ramazan Olçen tede estbî, tu muracatê Kurdkî layîqê xelate nêdî.
Beşê Tirkî
Beşê Tirkî de, endamanê jurî yê ke tede Banu Guven, Faruk Bîldîrîcî, Alî Duran Topuz, Candan Yildiz, Nezahat Dogan û Mehmet Alî Çelebîyî estbî, xebera Adem Ozgurî ya Bir+Bir Expressî ya bi nameyê “Rayîrîya hetê Welatê Xerîbîye” heqê xelata yewîne dî. Xebera Cengîz Karagozî ya HalkTv.com.tr’yî ya bi sernameyê “Wexto ke babîyê gedeyê ke pê reyde şer kerdbi qeymeqam vejîya, cuya înan bîye tarî: Çîyê ke qereqolê Mezîtliyî de ameyî cuyayene, hişî sereyê merdimî ra benê” heqê Xelata Taybete ya Jurî amey dîyayîş.
Beşê Xebera bi Dîmenî
Jurî, Beşê Xebera bi Dîmenî de zî xebata Mûrat Baykara û Tuncay Ogretenî ya Vosy Medyayî ya bi sernameyê “Vatan de Îşkence: Reydeya Raporanê Derbkerdişî yê ke Yenê Nimitene” heqê xelata yewinee dî.
Rojnamegerîya cinîyan
Endamanê jurî yê Rojnamegerîya Cinîyan Arjîn Dîlek Oncel, Derya Ceylan, Elîf Ekîn Saltik, Gulfem Karataş û Bîrcan Degîrmencî, tu xeberê ke seba Musebaqa ameybî şawitene layîqê xelata yewine nêdîyî. Jurî, xebera Elfazî Toral ya JINNEWSî ya bi sernameyê “Gilok bi Gilok Têkoşînê Haştîye” ke qala hîkayeya Mayanê Haştîye kena, layîqê Xelata Taybete ya Jurî dî.