ZAZAKÎ NEWS – Ciwano Kurd yo 22 serrî San Colayî, weçînayîşanê herêmîyan ê ke eyaletê Renê Zımeyî-Westfalyayî yê Almanya de ameyî viraştene de, nameyê Partîya Sosyal Demokrate (SPD) ser o şaristanê Wittenî de serkewtişêko pîl dest fîna.
Colayî, bi 370 reyanê ke herêma Innenstadt-Sudwestî de girewtî, heqê kewtişê meclîsê şaristanî dest fîna.
Netîceyêko ke nêameyêne pawitene
San Colayî va: “Ma vera sîyasetmedaranê bitesîran de pabeyê yew serkewtişê winasî nêbîyî. Umîdê serkewtişî estbi, la mi texmîn nêkerdêne ke o do hende lez bêro.”
SPDyî, herêma ke Cola tede namzed bi de, panc serrî verî cû vera Partîya Keskan de vîndî kerdbi. Yeno vatene ke nê sîyasetmedarê ciwanî bi nê serkewtişî ageyrayîşêko muhîm seba Sosyal Demokratan temîn kerdo.
San Colayî da zanayene ke o do seba Wittenî hîrê çîyanê serekîyan ser o bixebitîyo û wina dewam kerd:
“Ez do hîrê babatan ser o bixebitî; ez wazena bazaro herêmî xurt bikerî. Çi heyf ke, sey nimûne yew kitbxaneyo kehen ê şaristanê ma ame qefilnayîş.”
Colayî ancî da zanayene ke o wazeno têkilîyanê şaristananê Almanan şaristananê Herêma Kurdistanî reyde aver bero û va ke o têkilîyanê xo Silêmanî, Hewlêr û şaristananê Rojawanê Kurdistanî reyde domneno.