Hetê Baroya Amedî ra, verê Edlîyeya Amedî de xeylê kesî amey têhet û heta Mînareya Çarlinge ya ke Elçi uca amebi kiştiş, rayîrşîyayîş organîze kerd.
Rayîrşîyayîşî rê Serekê Yewîya Baroyanê Tirkîya (TBB) Erinç Sağkan, serekê baroyanê bînan, huqûqnasî, temsîlkarê partîyanê sîyasîyan û dezgehanê komelê sivîlî tewrê ci bîy.
Beşdaranê rayîrşîyayîşî pankartê bi Zazakî/Kurmancî û Tirkî ya "Ma do to xo vîra nêkerê" akerd û fotografê Elçiyî sîneyê xo de aliqnay. Kome bi çepikan û sloganê "Tahir Elçi nêmerden o" rayîr ra şî û verê Mînareya Çarlinge de eşkerayîye daye.
Vengê Elçiyî ame goşdarîkerdiş
Verê mînare de deyîra Ahmet Kayayî "Diyarbakır Türküsü" û qiseykerdişê peyên ê Tahir Elçiyî ke 10 serrî verê cû tîya kerdbi, amey goşdarîkerdiş.
Tîya Serekê Baroya Amedî Abdulkadir Güleçî qisey kerd. Güleçî va "Ma 10 serrî yo seba edalet û azadîye rayîr şinê. Tahir Elçi netîceya 'suîkastêkê sîyasî' de ame qetilkerdiş. No cinayeto ke verê kamerayan de ame kerdiş, 10 serrî yo nêameyo roşnîkerdiş."
Sağkan: Ma seba edaletî tîya de yê
Serekê TBByî Erinç Sağkanî zî va: "Ma 10 serrî yo nê erdan ser o dewaya edaletî kenê. Vatişê ci rehet o, 10 serrî... Ma tenya seba vîrardişî nê, seba heqê edaletî tîya de yê. Faîlê Tahir Elçiyî wa verê dadgehe de hesab bidê, coka ma tîya de yê."
Eşkerayîye, dima ke qaranfîlî ronîyay cayê mergî, qedîyaye
