Şaredarîya Amedî ya Bajarê Girdî, muracatê hetkarîya perwerdeyî ke do emser wendekaran rê ke reya verêne unîversîte de ca girewto, bêro dayene, qedênayî. 3 hezar û 632 wendekaran ke krîteran anê ca, her di aşman de 5 hezarî û pêro pîya 15 hezar TL hetkarîya perwerdeyî do bêro dayene.
Hetê Serekîya Daîreya Xizmetanê Sosyalan ra, seba ke wendekarê 30 serre û binê ci ke 13ê Tebaxe ra ver Amed de ciwîyayê û unîversîteya dewlete yan zî yê xususî de bi bursê %100î reya verêne qeyd kerdo, înan rê hetkarîya perwerdeyî bêro dayene, yew proje ame afirnayene. Proje de muracatan 3ê Teşrîna Verêne de dest pêkerd û 1ê Teşrîna Peyêne de qedîyayî.
6 hezar û 569 wendekaran muracat kerd
Pêro pîya 6 hezar û 569 wendekaranê ke waştêne hetkarîya perwerdeyî ra îstîfade bikê muracat kerd. Badê ke muracatî qedîyayî, muracatê wendekaran hetê şertanê ke beyanat de ameyî dîyarkerdiş ra ameyî nirxnayîş. Netîceyê kontrolan de 3 hezar û 632 wendekaranê ke şertanê muracatî anê ca, heqê hetkarîya perwerdeyî girewt.
Pêro pîya 15 hezar TL hetkarîya perwerdeyî yena dayîş
3 hezar û 632 wendekaran rê ke reya verêne unîversîteyan de qeyd bîy, her di aşman de 5 hezarî û pêro pîya 15 hezar TL hetkarîya perwerdeyî do bêro dayene.
Lînko ke encamê muracaatan tede yenê musnayîş
Wendekarê ke heqê hetkarîya perwerdeyî girewto, eşkenê numreyê nasnameyê TC, name û payname adresa https://egitimdestek.diyarbakir.bel.tr/ de bitiknê û encaman bimusê.
Tayê wendekarî bi SMS’î yenê agahdarkerdene
Wendekarê ke unîversîteyê dewlete de ca girewto û wendekarê ke unîversîteyê vakif/xususî de bi bursê %100î ca girewto û belgeyê xo est ê, bi SMS’î yenê agahdarkerdene.
Teqsîto verên meşte yeno dayîş
Her di aşman de 5 hezar TL teqsîtê ke do bierşawîyo, teqsîto verên 18ê Teşrîna Peyêne roja Dişeme hesabê wendekaran rê erşawîyeno.
Çime: Bultenê Şaredarîya Amedî