Şewa 28ê Kanûne, teyarayanê şerî yê Tirkîya mintiqaya Heftanînî de hemwelatîyê sivîlî yê Kurdî yê ke debara xo bi bazirganîya sînorî kerdêne, bombardûman kerdî. Netîceyê bombardûmanî de 34 hemwelatîyê sivîlî ke 19ê ci gedeyî bîy, merdî.
Kes nêame cezakerdene
Qirkerdişê Roboskî tarîxê Komara Tirkîya de yew qirkerdişo tewr pîl o. Herçiqas ke serê hedîseyî ra 14 serrî vîyartê, heta nika kiştox yan zî rayedarêkê Tirkîya nêameyo cezakerdene.
Eksê ci, rutbeyê fermandaranê ke o wext artêşa Tirkîya de verpersîyar bîy, ameyî berzkerdene.
"Qurbanî yenê yadkerdene"
Her serre 34 qurbanîyê qirkerdişî, goristanê dewa Bêjuhê de bi çalakîyanê cîya-cîyayan yenê vîrardene. Yeno pawitene ke emser zî bi rayberîya partîyanê sîyasîyan û dezgehanê komelê sivîlî, dewanê Roboskî û Bêjuhê de merasîmê yadkerdişî bêrê viraştene.
Keyeyê qurbanîyan her serre serê goran de vengdayîşê edaletî kenê. Keyeyê Roboskî fotografanê gedeyanê xo sîneyê xo de tepişnenê û wazenê verpersîyarê qirkerdişî bêrê muhakemekerdene.
DMME dewa red kerdbi
Dadgeha Heqanê Merdiman a Ewropa (DMME), 17ê Gulana 2018î de bi bahaneyê 'avûkatan belgeyê lazimî wextê xo de amade nêkerdê', dosyaya Dewaya Roboskî red kerdbî.