Qismêkê Camîya Pîle ke ewnîyeno Bazarê Çarşîya şewitî ser, bi têlanê qefesî ame padayîş. No kar hetê ê Mudirîya Mintiqaye ya Weqfan ra bi bahaneyê "tedbîrê vera dizdan" ame kerdene. Na kerdene bî sebebê hêrs û reaksîyonê şarî.
“Tedbîrê vera dizdan”
Esnafê ke serê sibayî şîy dorê camî şaş mendî. Esnafan va ke no mudaxeleyo vera camîya tarîxîye zerar dano cewherê mîmarî û asîyayîşê estetîkî yê camî. Şarî va ke, seba pawitişê bînayanê tarîxîyan usûlê cîya-cîyayî şênê bêrê xebitnayene û ard ziwan ke na xebate Camîya Pîle kerd sey zindanêk.
Tayê esnafan zî vera ney hêrsê xo mojna û vat ke ganî seba pawitişê awanîya tarîxîye rayîr û metodê winasî bêrê weçînitene ke zîyan nêdê eseranê tarîxî.
