ZAZAKÎ NEWS – Germê Amedî namdar o û emser zî bi ameyîşê aşma temuze germ tesîrê xo mojna. Teber de germîya hewayî nêzdîyê 40 derece bîya, la firinan de verê adirî de germîya hewayî resena 60 derece. Westeyê ke şefeq ra heta şan seba debara xo xebatêka pête kenê, mîyanê nê adirî de karê xo rê dewam keno.
"Ma nanê helalî dima yê"
Ali Kılıç o ke Cadeyê Hz. Süleymanî de 35 serrî yo ke firincîtî keno, derheqê na xebate de wina va: "Nê germî ver de zî ma nanê helalî dima yê. Armancê ma no yo ke ma yew parçe nanê helalî berê keye. Pêro mucadeleyê ma seba ney o. Ma binê şartanê zaf giranan de xebatitîyenê û nan pewjenê. Wextê xebata zî ma zaf zêde yo. La ancî zî şikir ma razî yê. Kare ma zimistan weş û rehat o la hamnan ma binê nê germî de zaf zehmetî ancenê."
