Paytextê Venezuela Caracas de şewe (goreyê saeta herêmî 02.00 de) vengê teyareyan û dima ra vengê teqayîşantêdima ameyî eşnawitiş. Ame vatiş ke herême de tewr tay 7 teqayîşî bîyê û hetê başûrê bajarî de elektrîk birîyayo.
Muhabîra Al Jazeera Lucîa Newmane va ke teqayîşî nezdiya Fortuna, ke baregehê leşkerî yo de ameyê meydan. Newmane va, "Fortuna uca de baregehêko leşkerî yo muhîm o. Pêro herême de vengê teqayîşan ame eşnawitene û dima ra biryayîşê elektrîkî ame meydan."
Helîkopter û teyareyî ameyî vînayîş
Heto bîn ra asmênê Caracasî de xeylê helîkopter û teyareyî, û cayanê ke ameyê pirodayene ra dûmanê ke berz bîyêne, ameyî vînayîş.
Hukmatê Venezuela: Armancê Amerîka petrol û maden î
Eşkerayîya ke hetê hukmatê Venezuela ra ame dayîş de, hêrişkarîya leşkerî ya Amerîka amey redkerdiş û wina ame vatiş: “Armancê hêrişanê Amerîka o yo ke çim vistı petrol û madenanê Venezuela. Amerîka do nêeşko dest rono nê çimeyan ser. Hêrişî eyaletanê Caracas, Mîranda, Aragua û La Guaîra de ameyî kerdiş."
Maduroyî Halê Îstîsnayî (OHAL) îlan kerd
Serekê Dewleta Venezuela Nîcolas Maduroyî veng da pêro hêzanê cimatkî û sîyasîyan ke plananê seferberîye bierzê dewre û eşkera kerd ke ey seranserê welatî de OHAL îlan kerdo. Kolombiya zî, seba kombîyayîşî veng da Miletê Yewbîyayeyan (BM).
CBS: Hêrişî bi emrê Trumpî ameyî kerdene
Goreyê rayedaranê Amerîkayijan ê ke CBSî rê qisey kerdê, hêrişê vera baregehanê leşkerîyan ê Venezuela, bi emrê Serekê Amerîka Donald Trumpî ameyê kerdene.
