Avaşîn Yılmaz
Programo hîra yo ke do 8 Aşmî dewam bikero, Amed de dest pêkerd. Programo ke amanc keno kalîteyê rojnamegerîya herêmî zêde bikero û kapasîteyê meslegî yê rojnamegeranê xoseran aver bibero, roja xo ya verêne ra rastê eleqeyêko weş ame. Zaf rojnamegerê ke rojnameyanê herêmîyan de xebitîyenê tewrê programî bîyî.
Roja verêne bi perwerdeyan dest pêkerd
Waar TV ra Mehdî Mutluyî derheqê pêşkêşkarîya programî de zanayîşê xo pare kerdî, Muşawîro Malî Îbrahîm Yeşîlçîmenî zî derheqê îdarekerdişê ekonomîya alternatîfe de pêşkêşîyêk kerde. BBC ra Hatîce Kamer zî derheqê hîkayeviraştişê xebere de perwerdeyêko hîra da.
Qonaxa verêne ya programî de, bi serekîya nameyanê pisporan ê ke dezgehanê medyaya globalan de kar kerdê, atolyeyê teknîkî do bêrê viraştene. Na çarçewa de; BBC ra Hatîce Kamere hîkayeviraştişê xebere, AFP ra Mahmut Bozarslanî teknîkê weşanê zindîyî, Reuters ra Sertaç Kayar fotomuxabîrîye, derhênere Semîha Yildize kurguyê vîdyoyî û Perxudres ra Omer Faruk Baran zî do hazirkerdişê podkastî ser o perwerde bidê.
Kadroyê perwerdeyî de wina zî; Waar TV ra Mehdî Mutlu (pêşkêşkarîya programî), Deutsche Welle ra Hozan Adar (rojnamegeran rê hişo sunî), The Washington Post û The Guardian ra Berîl Eskî (rojnamegerîya cigêrayoxe), Vecdî Erbay (teknîkê roportajî), Muşawîro Malî Îbrahîm Yeşîlçîmen (îdareyê deamayîşê alternatîfî) û Baroyê Amedî ra Şîraz Baran (heqê rojnamegeran û huquq) ca gênê.
Çarçewaya programî de reyna warê asayîşê dîjîtalî de zî yew modulo xusûsî do bêro pêşkêşkerdene. Nê perwerdeyanê ke do bi perwerdekarîya endazyara berze ya komputerî Nergîs Malale raşt bêrê kerdene de, do asayîşê rojnamegeran yê waranê îrtîbatî û sepananê (uygulamayanê) banqekerdişî ser o vinderîyo.
Demê pratîkî yo ke do perwerdeyan ra pey dest pêbikero û 7 mengî dewam bikero de, 13 rojnamegerî do bi hetkarîya mentoranê profesyonalan bi hawayêko aktîf xebere amade bikerê. Muhtewayê ke ameyê hazirkerdene, do 8 rojnameyanê herêmîyan û 5 platformanê xoseran ê herême de bêrê weşanayene.
