Şaredarîya Çewlîgî ya ke destê AKPyî de ya, faturayanê awe ser o %78 zam kerd. Kombîyayîşê Meclîsê Şaredarîye de, bi reyanê endamanê meclîsî yê AKPyî qerarê zamî yê %78î ame girewtiş.
Grûba Meclîsê Şaredarîye yaDEM Partî ke kombîyayîşê meclîsî de reyê redî day, derheqê qerarê zamî de eşkerayîyêka nuştekîye da. Eşkerayî de ame vatiş ke şaredarîye cayo ke wa problema awe çareser bikero, yew zamêko gird kerdo û ame waştiş ke wa no qerarê zamî cade peyser bêro girewtiş.
Eşkerayî de dîya vîrvistiş ke Çewlîg 23 serrî yo hetê AKPyî ra yeno îdarekerdiş û wina ame vatiş: “Resayîşê awa pake, heqê cuye yo tewr bingeyên o. Problemê awe ke demêko derg o dewam keno, her roje hîna zêde weşî û kalîteya cuye ya şarê ma rê bena tehdît. Cigêrayîşanê ke ma sey Grûba Meclîsê Şaredarîye ya DEM Partî ya Çewlîgî kerdî de, tesbît bîyo ke perçeyê 2 kîlometreyan ê awe ya şimitişîke Dewa Baxçeyî ra yena, golêk de yena depo kerdiş, kanalanê akerdeyan ra yena neqilkerdiş û bê ke bêro guznayîşdîyena şebekeyê bajarî. Aşkera yo ke na awe ya ke serê ci akerde û bêsafî yena neqilkerdiş, hetê weşîya şarî tehdîd kena.”
